“Bloomberg” dollar indeksi ABŞ və Çin arasında artan ticarət gərginliyinin bazarlarda volatilliyi artırması və qlobal artım proqnozuna təsir etməsi səbəbindən oktyabr ayından bəri ən aşağı səviyyəyə düşüb.

Dollar dünən günortadan sonra Nyu-York ticarətində 1,71 faizə qədər azalıb ki, bu da 2022-ci ildən bəri ən böyük gündəlik enişdir. Dollar enişi nəticəsində investorların qızıl, İsveçrə frankı və Yapon yeni kimi təhlükəsiz limanlara axışması baş verib.

“Dolara olan inam təhlükə altındadır”, –  “Oversea-Chinese Banking Corp.”un valyuta strateqi Kristofer Vonq deyib. Vonq əlavə edib ki, dolların ehtiyat valyuta statusu ilə bağlı şübhələr ABŞ-ın müstəsnalığının azalması və borcunun artması kimi amillərə görə artıb. “National Australia Bank Ltd.”-nin investorları həllin qaçılmaz olduğuna inanmayınca dollara satış təzyiqinin davam edəcəyini proqnozlaşdırır. Strateq Rodriqo Katril, “ABŞ aktivlərindən çıxmaq və dolları satmaq söhbəti ticarət gərginliyi yüksək qaldığı müddətcə davam edəcək”, – deyib

Dolların ucuzlaşması həm də tariflərin iqtisadiyyata göstərəcəyi təzyiq səbəbindən FED-in faiz dərəcələrini aşağı salmağa davam edəcəyi ilə bağlı gözləntilərin artması ilə bağlı olub. Digər tərəfdən, ABŞ-da dünən açıqlanan mart ayı üçün İstehlak Qiymətləri İndeksi (İQİ) gözlənilmədən düşdü. Əvvəlki ayla müqayisədə 0,1 faiz artması gözlənilən İQİ-də 0,1 faiz azalma açıqlanıb.

Fevral ayında qüvvəyə minən bəzi tariflərin ABŞ inflyasiyasına hələ təsir etmədiyi görünsə də, “JP Morgan Asset Management”in baş strateqi Devid Kelli məlumatları fırtınadan əvvəl sakitlik kimi şərh edib və tariflərlə bağlı qiymət artımını proqnozlaşdırıb.