Rumıniyada ləğv edilmiş prezident seçkilərində birinci olmuş, lakin may ayında təkrar seçkilərdə iştirakına icazə verilməyən Kelin Corcesku amerikalı jurnalist Taker Karlsona müsahibə verib.

NATO və AB əleyhinə olan sağçı siyasətçi dərc olunan müsahibəsində namizədliyini müdafiə edərək, sülh tərəfdarı mövqeyinə görə bloklandığını deyib. ABŞ-ın keçmiş dövlət katibi Entoni Blinken və Fransa prezidenti Emmanuel Makrona işarə edən Corcesku, “Hamı bunun xarici müdaxilə olduğunu və Blinkendən gəldiyini bilir. O, seçkilərə müdaxilə edib, sistemə nə edəcəyini diktə edib. Rumıniyada sistem 100 faiz kənar müdaxilə ilə idarə olunur. ABŞ seçkilərindən əvvəl Entoni Blinken nəzarətdə idi. Trampın dövründə Fransa tam nəzarətindədir. Rumıniyanın hazırkı prezidenti Makrondur”.

Corcesku, NATO-nun Avropadakı ən böyük hərbi bazasının ölkəsində qurulacağını vurğulayaraq, “Üçüncü Dünya müharibəsini Rumıniyadan başlamaq istəyirlər”, – deyib.

Sülh istədiyi üçün hədəf alındığını iddia edən siyasətçi “Qlobalist mafiya məni blokladı”, – deyib.

O, əlavə edib ki, Moskvanın dəstəyinə malik olmaq ittihamı həm ona, həm də Donald Trampa yönəlib.

Müstəqil namizəd Corcesku 24 noyabr 2024-cü ildə keçirilən prezident seçkilərinin birinci turunda 22,95 faiz səslə birinci olub.

Siyasətçinin TikTok kimi sosial media platformalarından istifadə uğuru Rusiyanın seçkiyə müdaxiləsi iddiaları ilə gözdən salınıb.

Rumıniyanın Konstitusiya Məhkəməsi ötən ay Corceskunun namizədliyinin rədd edilməsini təsdiqləyib.

62 yaşlı siyasətçi bu qərardan sonra Rumıniyanın gələcəyini xalqın müəyyən edəcəyini iddia edib.

Corceskunun prezident olmasının qarşısını almaq üçün bir çox tədbirlər görüldü.