ABŞ-ın texnologiya məhsullarına tariflərdən müvəqqəti azad etməsi qlobal birja bazarlarını dəstəklədi, baxmayaraq ki, Tramp qərarının prosedur xarakterli olduğunu və bu sektora müəyyən nisbətdə tətbiq ediləcəyini söyləyib. Qlobal bazarlar yeni həftədə tariflərlə bağlı inkişafları yaxından izləyəcək.

ABŞ fond indeksləri 2023-cü ilin noyabr ayından bəri ən yaxşı həftəsini keçirdi. Səhmlər ABŞ istiqrazlarının gəlirlərindəki yavaşlama və dolların ucuzlaşması ilə dəstəkləndi, dəyişkənlik isə o qədər də azalmadı, bu da tariflərlə bağlı narahatlıqların davam etdiyini göstərir.

Boston FED-in prezidenti Suzan Kollins, cümə günü “The Financial Times”a verdiyi müsahibədə, zərurət yaranarsa, FED-in maliyyə bazarlarını sabitləşdirməyə kömək etməyə hazır olacağını söylədi ki, bu da sona çatan həftədə “S&P 500” indeksinin 1,8 faiz artmasına səbəb olan əsas amillərindən biri idi. “Nasdaq 100” texnologiya indeksi də 1,9 faiz artmışdı.

ABŞ-ın 10 illik istiqraz faizi cümə günü çatdığı pik səviyyələrdən düşsə də, həftəni təxminən 50 baza bəndi artımla 4,49 faizə çatdırıb.

ABŞ-ın elektronika tariflərindən imtina etmək qərarı, müvəqqəti olsa da, bu səhər ABŞ və Avropa indeksi fyuçerslərini və Asiya bazarlarını dəstəkləyib.

Yeni ticarət günündə ABŞ fyuçers indekslərinin təxminən 1 faiz, Avropa fyuçers indekslərinin isə 2 faizdən çox artacağı gözlənilir.

Asiya birjalarında Yaponiyanın “Nikkei 225” indeksi 1,8 faiz, “Honq-Konq” indeksi 2,4 faiz, Çinin “CSI 300” indeksi 0,5 faiz bahalaşıb. Asiya texnoloji səhmlərinin göstəricisi, “Samsung Electronics Co.” və “iPhone” montajçısı “Hon Hai Precision Industry Co.” səhmlərinin liderliyində bir anda 2,6 faizə qədər yüksəlib.

Səhmlər elektronikanın müvəqqəti azad edilməsi xəbərini müsbət qiymətləndirsə də, digər maliyyə alətlərində narahatlıq əlamətləri müşahidə olunmağa davam edir. Ötən həftə ərzində yüzdə 2,44 dəyər itirən “Bloomberg” Dollar İndeksi bu səhər 2025-ci ilin ən aşağı səviyyəsini sınaqdan keçirdi. Dolların potensial ucuzlaşmasından qorunma tələbi son 5 ilin ən yüksək səviyyəsinə yüksəlib.

Keçən həftə 2 faizdən çox ucuzlaşan dollar bu səhər Yaponiya valyutasına tələbin davam etməsi ilə daha 0,3 faiz ucuzlaşıb. Təhlükəsiz sığınacaq qızıl cümə günü yeni rekorda çatdıqdan sonra bu səhər çox az dəyişib.

Qorxu göstəricisi VIX-də rekord azalmaya baxmayaraq, indeksin bir illik orta nöqtələrindən 20 bənddən çox yuxarı qalması bazarın daha ciddi və uzunmüddətli volatillik dövrü gözlədiyini göstərir.