Amerikalı kardinal Robert Frensis Prevost Papa seçiləndən sonra Roma amerikalı turistlərdən böyük maraq gözləyir.

Katoliklərin ruhani lideri Papa XIV Leonun yazdığına görə, bir çox amerikalı turistlər XIV Leonun andiçmə mərasimini izləmək üçün Romada hotel bron etmək üçün yarışırlar.

Vatikanda Müqəddəs Pyotr Bazilikasına baxan dam terrası ilə məşhur olan “Atlante Star” hotelinin sahibi Federico Mençuççi deyir ki, demək olar ki, bütün otaqlar amerikalı turistlər tərəfindən bron edilir.

İtaliya mətbuatında “Papa XIV Leo effekti” (“effetto Papa Leone XIV”) kimi xatırlanan turizm dalğasının Roma iqtisadiyyatına da ciddi töhfə verəcəyi bildirilir. ABŞ ziyarətçiləri artıq İtaliya paytaxtının ən böyük turist qrupunu təşkil edir. Keçən il təxminən 2,5 milyon amerikalı Romaya səfər etmişdi.

Romadakı dondurma salonlarının Amerika dadlarını cəlb etmək üçün “Papa Leone” ləzzətləri istehsal etdiyi, Vatikan yaxınlığındakı bir barda isə yeni Papanın adını daşıyan pivənin reklam edildiyi bildirilir.

“Tarixdə ilk dəfə Amerika Papasının seçilməsi, şübhəsiz ki, ABŞ turist axınına təsir göstərəcək. ABŞ turistləri artıq birinci prioritet müştərilərimizdir”, – Roma Turizm Şurasının üzvü Alessandro Onorato deyib.

İtaliya Hotellər Assosiasiyasının Roma bölməsinin direktoru Cianluka De Qetano, amerikalı turistlərin səfərləri zamanı “böyük xərclər” etdiklərini söylədi. Avropa Səyahət Komissiyasının fevral ayında dərc etdiyi sorğuya görə, Avropadakı hər üç amerikalı turistdən biri gündə 200 avrodan çox pul xərcləyir.

Roma və Latsiodakı səyahət agentləri birliyi olan “Assoviaggi-Confesercenti”nin prezidenti Cinzia Renzi bildirib ki, Papa Leonun ABŞ turist sayına real təsiri yalnız yaxın bir-iki il ərzində hiss olunacaq.

Birləşmiş Ştatlar dünyanın dördüncü ən böyük katolik əhalisinə ev sahibliyi edir.

88 yaşlı Papa Fransis aprelin 21-də, Pasxa bayramından bir gün sonra vəfat edib. Vatikan ölüm səbəbinin insult, koma və geri dönməz ürək çatışmazlığı olduğunu açıqlamışdı. Argentinalı Papa möhtəşəm mərasimlə son mənzilə yola salınmışdı.

Mayın 7-də Vatikanda başlayan Konklavın ikinci günündə 69 yaşlı Çikaqo kardinalı Robert Frensis Prevost Katolik Kilsəsinin 267-ci papası seçilib.