“The New York Times” qəzetinin yazdığına görə, İlon Mask prezidentlik kampaniyası zamanından bəri narkotik istifadəsini artırıb.

“Tesla” və “SpaceX” şirkətlərinin sahibi amerikalı iş adamı İlon Maskın ABŞ prezidenti Donald Trampın 2024-cü ildə iştirak etdiyi seçki kampaniyası zamanı narkotiklərdən “intensiv” istifadə etdiyi iddia edilib.

“The New York Times” (NYT) qəzeti ailə həyatı və uşaqları, Trampa yaxınlığı ilə tez-tez gündəmdə olan Maskın seçki kampaniyası zamanı narkotik istifadəsini artırdığını iddia edib.

Hesabatda Maskın içində təxminən 20 həb olan bir dərman qutusu daşıdığı və əməliyyatlarda anestezik olaraq istifadə edilən yüksək dozada ketamin istifadə etdiyi vurğulanıb.

Bundan əlavə, hesabatda onun vaxtaşırı sintetik narkotik və tərkibində psilosibin olan göbələklərdən istifadə etdiyi iddia edilib.

***

NYT-nin məlumatına görə, Mask daha əvvəl depressiya üçün ketamin istifadə etdiyini və dərmanı iki həftədən bir qəbul etdiyini bildirmiş, sosial media yazılarında və müsahibələrində psixi sağlamlığı ilə bağlı “böyük eniş-yoxuş və sonsuz stress” yaşadığını bildirmişdi.

Qəzetə danışan mənbə onu da bildirib ki, Mask saatlarla video oyunlar oynayır, həddən artıq yemək problemi yaşayır və “X” sosial media platformasında gecə-gündüz paylaşımlar edir.

***

53 yaşlı Mask Ağ Evdə Trampla keçirdiyi mətbuat konfransında suala dəqiq cavab verməkdən yayınıb.

Mask mövzu ilə bağlı verilən suallara, “Rusiya istintaqı ilə bağlı yalan xəbər yaydığı üçün Pulitzer mükafatını qazanan nəşr budur? Mən belə düşünürəm. Bir hakim “The New York Times”ın saxta xəbər orqanı olduğunu bildirib. Bəlkə Pulitzer mükafatını geri versinlər. Mövzunu bağlayaq”, – deyə cavab verib.

ABŞ prezidenti Donald Tramp jurnalistlərə açıqlamasında Maskın müntəzəm narkotik istifadəsi ilə bağlı iddialardan xəbərsiz olduğunu deyib.

Mask haqqında onu narahat edən heç bir şey olmadığını vurğulayan Tramp, “Düşünürəm ki, İlon əla oğlandır. Onunla bağlı məni heç nə narahat etmir”, – deyib.