Aylarla davam edən hədələr, güzəştlər, tarif məktubları və danışıqlardan sonra demək olar ki, ABŞ-ın bütün ticarət tərəfdaşlarını əhatə edən daha yüksək gömrük rüsumları Nyu-Yorkda gecə yarısından dərhal sonra tətbiq olunmağa başlayıb.

Avropa Birliyi, Yaponiya və Cənubi Koreya, o cümlədən avtomobil kimi əsas ixrac kateqoriyalarını əhatə edən məhsullara ABŞ-a idxal zamanı 15 faiz gömrük vergisinin tətbiqini qəbul edib.

Digər ölkələrə isə 10 faizdən başlayan və daha yüksək səviyyələrə çatan tariflər tətbiq edilib.

***

Bəzi ölkələrin daha əlverişli razılaşmalar əldə etmək üçün son anda göstərdiyi səylər nəticəsiz qalıb. İsveçrə Prezidenti ABŞ-da keçirdiyi danışıqlardan sonra 39 faiz gömrük vergisinin azaldılması ilə bağlı heç bir nəticə əldə etmədən Vaşinqtonu tərk edib. Tramp isə Rusiyadan neft aldığı üçün Hindistana qarşı tətbiq edilən tariflərin üç həftə ərzində 50 faizə qaldırılması qərarını verib.

“Bloomberg Economics”ə görə, ölkələr üzrə fərqli tarif dərəcələri nəzərə alındıqda ABŞ-ın ortalama gömrük vergisi 15,2 faizə yüksəlib. Bu göstərici ötən ilki 2,3 faizlə müqayisədə xeyli yüksəkdir və İkinci Dünya müharibəsindən bəri qeydə alınmış ən yüksək səviyyədir.

Yeni tariflər tezliklə açıqlanacaq

ABŞ-ın ən böyük üç ticarət tərəfdaşı olan Meksika, Kanada və Çin ilə tarif artımlarına dair danışıqlar ayrıca kanallar üzrə davam edir. Tramp isə yaxın vaxtlarda dərman və yarımkeçirici kimi strateji sektorlar üçün əlavə gömrük tariflərini açıqlayacağını bildirib.

Baxmayaraq ki, ABŞ iqtisadiyyatından daxil olan göstəricilər işsizliyin aşağı səviyyədə qaldığını və inflyasiyada ciddi artım müşahidə edilmədiyini göstərir, bəzi ekspertlər bu vəziyyətin davamlı olmayacağı qənaətindədir.

Keçmiş ABŞ ticarət danışıqları nümayəndəsi Vendi Katler “Bloomberg”ə açıqlamasında bildirib: “Daha çətin dövrlərin yaxınlaşdığına dair əlamətlər var. Bir çox şirkət gömrük tarifləri qüvvəyə minmədən əvvəl ehtiyatlarını artırdı. Lakin uzun müddətli aşağı mənfəət marjları davam etdirilə bilməz. Bu səbəbdən qiymət artımı demək olar ki, qaçılmazdır”.