Əcnəbi əhalinin artdığı Cənubi Koreya, çoxmədəniyyətli cəmiyyət modelinə keçidə hazırlaşır. “The Guardian”ın məlumatına görə, Seul hakimiyyəti miqrantların cəmiyyətə inteqrasiyasını sistemli şəkildə tənzimləməyə çalışsa da, əcnəbilər hələ də geniş yayılmış ayrı-seçkilik və stereotiplərlə üzləşirlər.

2025-ci ilin iyun ayına olan məlumata əsasən, Cənubi Koreyada yaşayan əcnəbi vətəndaşların sayı 2,11 milyona çatıb ki, bu da ümumi əhalinin təxminən 4,1 faizinə bərabərdir. Demoqrafiya üzrə mütəxəssislər hesab edirlər ki, bu göstərici 5 faizi keçərsə, ölkə artıq “çoxmədəniyyətli cəmiyyət” kimi təsnif edilə bilər.

Vaxt.az xəbər verir ki, əhali strukturundakı dəyişikliklər əsasən iqtisadi səbəblərlə bağlıdır. Cənubi Koreya qadın başına 0,75 uşaq göstəricisi ilə dünyada ən aşağı doğum səviyyəsinə malikdir. Proqnozlara görə, işçi qüvvəsi 2070-ci ilə qədər yarıya enəcək. Regionun digər ölkələri kimi, Cənubi Koreyada da gənclər inşaat, kənd təsərrüfatı və sənaye sahələrində işləmək istəmir. Bu boşluğu isə miqrant işçilər doldurur.

Ədliyyə Nazirliyinin Inteqrasiya İdarəsinin rəsmisi Park Çan-hyon ölkənin dəyişən miqrasiya siyasəti ilə bağlı deyib: “Biz istəyirik ki, miqrant uşaqlar Koreya cəmiyyətində bərabər imkanlara sahib olsunlar. Mədəni baxımdan özlərini rahat hiss edə biləcəkləri və istedadlarını nümayiş etdirə biləcəkləri mühit yaratmağı hədəfləyirik”.

İnteqrasiya tədbirləri əsasən Seulun 25 kilometr cənub-qərbində yerləşən sənaye şəhəri Ansanda cəmlənib. Bura ölkədə miqrantların ən sıx məskunlaşdığı ərazilərdəndir.

Şəhər əhalisinin 14 faizi, Vonqok-donq adlı məhəllədə isə bu göstərici 84 faizə çatır.

“Hope365” adlı qeyri-hökumət təşkilatı miqrantların uyğunlaşmasını sürətləndirmək üçün 18 dildə erkən adaptasiya kursları təşkil edir. Bu kurslarda bank hesabının açılması, səhiyyə xidmətlərindən istifadə, əsas qanunlar və Koreya mədəniyyəti haqqında məlumat verilir.

Təşkilatın könüllüləri miqrant uşaqlara yemək hazırlayır, onların dərslərinə kömək edirlər. Çin əsilli koreyalı Kim Myonq-sun deyir: “Uşağım bu mərkəzi çox sevir, burada böyük dəstək alır”.

Bununla belə, ölkədə miqrant işçilərin məşğulluq icazəsi sistemi ilə işlədilməsi tənqid olunur. Bu sistem onların iş yerini dəyişməsini ciddi şəkildə məhdudlaşdırır və işəgötürənlərə böyük səlahiyyət verir.

2024-cü ildə litium batareyaları istehsalı zavodunda baş verən yanğında əksəriyyəti Çin vətəndaşı olan 23 işçi həlak olmuşdu. İki həftə əvvəl isə sosial şəbəkələrdə yayılan videoda bir miqrant işçinin fərqli daşlarına bağlanaraq forkliftlə havaya qaldırıldığı əks olunmuşdu.

Hadisəyə reaksiya verən Cənubi Koreya Prezidenti Li Cae-myoonq bəyan etmişdi: “Bu, açıq şəkildə insan hüquqlarının pozulmasıdır”.

Ansan şəhərində yerləşən inteqrasiya mərkəzi eyni zamanda şikayət ofisi kimi də fəaliyyət göstərir. Burada miqrantların maaşların verilməməsi, təhdid və iş yerində istismar halları barədə şikayətləri mütəmadi qeydə alınır.