Çinin beynəlxalq kredit reytinqi sabit saxlanılıb. “Standard & Poor’s” beynəlxalq reytinq agentliyi Çin Xalq Respublikasının uzunmüddətli kredit reytinqini “A+”, qısamüddətli reytinqini isə “A-1” səviyyəsində təsdiqləyib. Reytinqin perspektivi isə sabit olaraq saxlanılıb.

Agentlik bildirib ki, zəif əmlak sektoru və xarici ticarətə təzyiqlərə baxmayaraq, güclü fiskal təşviqlər Çin iqtisadiyyatının dayanıqlığını qoruyub saxlayır. Qurum hesab edir ki, Çin qarşıdakı bir-iki il ərzində illik 4 faiz və ya daha yüksək iqtisadi artım tempinə geri dönə bilər.

Bunun fonunda hökumətin iqtisadiyyata dəstək tədbirlərini mərhələli şəkildə azaltması gözlənilir. Eyni zamanda ümumi dövlət borcunun ÜDM-ə nisbətdə illik artım sürətinin 6 faizin altına enəcəyi ehtimal olunur.