Məlumata görə, Ağ Ev işçiləri keçmiş prezidentlərdən Barak Obamanın da daxil olduğu üç keçmiş prezidentin portretlərini ziyarətçilərin görə bilmədiyi pilləkənə köçürüblər.

CNN-in mövzuya yaxın mənbələrə istinadən xəbər verdiyinə görə, ABŞ Prezidenti Donald Tramp işçilərə Obamanın Ağ Ev portretini Böyük Pilləkənin ən üstünə yerləşdirməyi tapşırıb. Böyük Pilləkən yalnız prezidentin ailəsi, Gizli Xidmət və seçilmiş heyət üçün açıq olan evə çıxan yoldur.

CNN-in məlumatına görə, buna görə ziyarətçilər portreti görə bilmirlər.

Mətbuat orqanı həmçinin keçmiş prezident Corc Buş və atasının – Corc H.V. Buşun portretlərinin də həmin pilləkən sahəsinə köçürüldüyünü bildirir.

Mövzu ilə bağlı məlumatlı mənbələr CNN-ə Trampın Ağ Evdə tez-tez estetik dəyişikliklərə qarışdığını deyib. CNN xəbər verir ki, Ağ Ev protokolu və ənənələrinə görə, keçmiş prezidentlərin portretləri ziyarətçilərin görə biləcəyi şəkildə binanın girişində nümayiş olunmalıdır.

“The Independent” isə məsələ ilə bağlı cavab haqqı üçün Ağ Ev, Barak Obama və Corc Buşun ofisləri ilə Corc H.V. Buş Prezident Kitabxanası və Muzeyi ilə əlaqə saxlayıb.

Bu addım, Tramp ilə 2009-2017-ci illər arasında Ağ Evdə işləyən Obama arasında gərginliyin artdığı bir dövrdə baş verir.

Milli Kəşfiyyat Direktoru Tulsi Qabbard keçən ay Obamanı Trampa qarşı “illərlə davam edən çevriliş”də ittiham etmişdi. Məxfiliyi qaldırılmış elektron məktubları yayımlayan Qabbard iddia etmişdi ki, həmin sənədlər Obama və rəsmilərinin 2016-cı il seçkilərinə Rusiya müdaxiləsi üzrə araşdırmada “xain bir plan” qurmalarını sübut edir. Tramp, Qabbardın sənədləri yayımlamasından bir neçə gün sonra, 22 iyulda Obamanı “xainlik”də ittiham etmişdi.

“Reuters” xəbər verir ki, buna cavab olaraq Obamanın sözçüsü Patrik Rodenbuş sənədlərdə “Rusiyanın 2016 prezident seçkisinə təsir etmək üçün çalışdığı, lakin heç bir səs manipulyasiya etmədiyi” barədə geniş qəbul edilmiş nəticəni təkzib edən heç bir dəlilin olmadığını bildirib. Rusiya seçkilərə müdaxilə iddialarını rədd edir.

Rodenbuş həmçinin bu ittihamları “qəribə”, “gülməli” və “pis diqqət yayındırma cəhdi” adlandırıb. Bu açıqlamalar, Ceffri Epşteyn araşdırmasına yanaşması səbəbindən həm Respublikaçılar, həm də Demokratlar tərəfindən tənqid olunduğu bir vaxtda verilib.

Keçən həftə isə ədliyyə naziri Pam Bondi, Obamanın rəhbərlik etdiyi dövrdə seçkilərə Rusiya müdaxiləsi barədə kəşfiyyat hazırlayan rəsmilərlə bağlı böyük jüri araşdırması başlanması üçün prokurorlara göstəriş verib. Bu, ittihamlarla bağlı yaxın zamanda məhkəmə işinin başlanacağı anlamına gəlmir.

Tramp həmçinin hər iki Buşla da münaqişədədir. Ata Buş 2017-də Trampa “yalançı” demiş və 2016-cı ildə rəqibi Hillari Klintonu dəstəkləmişdi. Tramp isə 2021-də oğul Buşu “uğursuz və ilham verməyən” prezident kimi xarakterizə etmişdi.