Kolumbiyada sağ qanad müxalifətin 2026-cı il prezident seçkilərində potensial namizədi olan və mitinq zamanı silahlı hücuma məruz qalan Senator Migel Uribe Turbay (Miguel Uribe Turbay) üçün vida mərasimi keçirilib.

Uribe üçün ilk mərasim paytaxt Boqotadakı Konqres binasında təşkil olunub.

Senat Prezidenti Lidio Qarsia (Lidio Garcia) çıxışında bütün kolumbiyalıları birlikdə olmağa çağıraraq bildirib: “Fərqliliklərimizi bir kənara qoyaq və sülh içində yaşamağı öyrənək. Migel siyasi karyerası boyunca bundan heç vaxt geri çəkilməyib”.

Keçmiş Kolumbiya Prezidenti Alvaro Uribe adından çıxış edən Demokratik Mərkəz Partiyasının sədri Qabriel Valyejo (Gabriel Vallejo), Alvaro Uribe tərəfindən yazılmış sözləri oxuyub.

Keçmiş Prezident Uribe, senator Uribeyə edilən sui-qəsdin tam şəkildə araşdırılmasını istəyərək, müttəfiq ölkələrin kəşfiyyat xidmətlərindən dəstək çağırışı edib.

Uribenin cəsədi ailə üzvlərinin müşayiəti ilə daha sonra Primat Katedralına aparılıb və burada ayin keçirilib.

Uribenin cənazəsi Boqotadakı Mərkəzi Qəbiristanlıqda torpağa tapşırılıb.