ABŞ Maliyyə Naziri Skott Bessent bildirib ki, Ukraynanın işğalından əvvəl Hindistanın neftinin 1%-dən azı Rusiyadan gəlirdi, indi isə bu göstərici 42%-ə yüksəlib. Bessent vurğulayıb ki, Hindistanlı zənginlərin bəziləri idxal olunan nefti yenidən sataraq mənfəət əldə edir.

ABŞ Maliyyə Naziri Skott Bessent, Hindistanın ən zəngin ailələrindən bəzilərinin Rusiya xam nefti alımlarından faydalandığını irəli sürərkən, eyni zamanda Hindistana qarşı gömrük tariflərini artırma planlarını da təkrarlayıb.

Sanksiya altında olan Rusiya neftini satın aldıqları üçün Hindistana qarşı ikinci tarifləri artırmaq niyyətində olduqlarını bildirən Bessent, dünən verdiyi müsahibədə qeyd edib ki, Rusiya 2022-ci ildə Ukraynanı işğal etmədən əvvəl Hindistanın neftinin 1%-dən azı Rusiyadan gəlirdi, indi isə bu göstərici 42%-ə çatıb və Hindistanın “fürsətçilik” etdiyini bildirib.

Bessent həmçinin əlavə edib ki, Hindistanın ən zəngin ailələrindən bəziləri bu nefti yenidən satırlar.

Bessent-in son açıqlamaları, ABŞ Prezidenti Donald Tramp idarəsinin Hindistana və dolayı yolla Asiyanın ən zəngin milyarderi Mukeş Ambaniyə qarşı təzyiqlərini artırdığını göstərir. Ambaninin sahibi olduğu “Reliance Industries Ltd.” Qərbi Hindistanda dünyanın ən böyük neft emalı kompleksini idarə edir və rus xam nefti alıcıları arasında yer alır.

Həftə əvvəl isə Ağ Ev ticarət müşaviri Piter Navarro, “Financial Times”da dərc olunan bir məqalədə, Cənubi Asiya ölkəsinin neft zənginlərini və onların hökumətlə əlaqələrini hədəf almış, alımların artımını “fürsətçilik” olaraq qiymətləndirmişdi.

Tramp Hindistanın ABŞ-ya ixracına tətbiq olunan vergiləri 50%-ə qədər artırmaqla hədələyir. Bu, hər hansı bir ölkənin məhsullarına tətbiq olunan ən yüksək vergilərdən biri olacaq.