Venesuelanın Miranda ştatında yerləşən yüksək təhlükəsizlikli “Yare III” həbsxanasında baş verən üsyan nəticəsində azı 5 məhbus həlak olub.

VAXT.AZ “El Pais”ə istinadən xəbər verir ki, hadisənin paytaxt Karakasdan təxminən 70 kilometr məsafədə yerləşən həbsxanada baş verdiyi bildirilir. Rəsmi məlumata görə, məhbuslar arasında yaranan mübahisə qısa müddətdə genişmiqyaslı iğtişaşa çevrilib.

Venesuela hökuməti ölən məhbusların şəxsiyyətlərini açıqlayıb. Onların Keivin Matamoros, Eliécer Kordoba, Erkin Ramos, Xose Andrade və Xean Karlos Ximenes olduğu bildirilib. Ölüm səbəbləri barədə isə rəsmi açıqlamada detallı məlumat verilməyib.

Məlumata görə, üsyanın mümkün səbəblərindən biri həbsxanaya yeni məhbusların köçürülməsi olub. Hadisə zamanı yaralananların olduğu bildirilirsə də sayları açıqlanmayıb. Üsyandan sonra həbsxana ətrafında təhlükəsizlik tədbirləri gücləndirilib və ailə görüşləri müvəqqəti dayandırılıb.

Venesuela Baş Prokurorluğu hadisənin səbəblərini araşdırmaq üçün xüsusi komissiya yaradıldığını açıqlayıb. Rəsmi qurumlar üsyanın dəqiq səbəblərinin müəyyən edilməsi və məhbusların hüquqlarının təmin olunması məqsədilə istintaqın davam etdiyini bildirir.

Hüquq müdafiə təşkilatları isə Venesuela həbsxanalarında uzun müddətdir davam edən problemlərə diqqət çəkir. Onların sözlərinə görə, ölkədə həbsxanalarda sıxlıq, tibbi xidmət çatışmazlığı və ağır yaşayış şəraiti tez-tez zorakılıq hallarına səbəb olur.