Avqustun 20-də etibarən metronun «Sahil» stansiyası bağlanacaq. Qatarlar bu stansiyada dayanmadan «İçərişəhər» və əks istiqamətdə hərəkət edəcək. «Bakı Metropoliteni» QSC-nin mətbuat xidməti və ictimaiyyətlə əlaqələr şöbəsinin rəisi Nəsimi Paşayev bildirib ki, 1967-ci ildə istismara verilən ilk 5 stansiyasından biri olan «Sahil» stansiyasında eskalatorların istismar müddəti başa çatıb və onların yeniləri ilə əvəzlənməsi zərurəti yaranıb.

«Hazırda bu stansiyada 1967-ci ildə quraşdırılmış eskalatorlar istifadədədir. İstismar müddəti başa çatdıqdan sonra əsas işimiz bu 3 eskalatoru yeniləri ilə əvəz etməkdir. Əsas məqsədimiz hər 3 eskalatoru çıxartmaqdır. Fərqli bir məqam odur ki, çıxan 3 eskalatorun yerinə Almaniya istehsalı olan 4 daha müasir eskalator quraşdırılacaq.

Eskalatorların sökülüb-quraşdırıldığı müddətdə stansiyanın əsaslı təmir olunması da nəzərdə tutulub.

«Bu işlər  çərçivəsində stansiyanın mərmər-qranit örtüyü, istismar müddətini başa vurmaqda olan, köhnəlmiş və müasir dövrün tələblərinə cavab verməyən avadanlıqları yenilənəcək».

Təmir işlərinin 2018-ci ilin iyun ayının sonlarına qədər yekunlaşdırılması nəzərdə tutulur.

«Bu müddət ərzində sərnişinlərdən xahişimiz budur ki, gedəcəkləri marşrutu əvvəlcədən daha dəqiq müəyyən etsinlər. Qatarlarımız «Sahil» stansiyasında dayanmayacaq. Bu əraziyə getmək istəyənlər «Sahil» stansiyasına ən yaxın olan «28 May» və «İçərişəhər» stansiyalarından istifadə edə bilərlər».

Qeyd edək ki, Azərbaycan prezidentinin 18 mart 2011-ci il tarixli sərəncamı ilə təsdiq olunmuş «Bakı Metropoliteninin inkişafına dair Dövlət Proqramı»nda stansiyaların yenidən qurulması, əsaslı təmiri və müasir avadanlıqlarla təchiz olunması nəzərdə tutulub.