Macarıstanlı avroparlamentari, xarici işlər komitəsinin üzvü Gyorgi Şöpflin (György Schöpflin) Azərbaycan mətbuatının suallarını cavablandırıb.

- Avropa İttifaqının BMT-də Ukrayna ərazi bütövlüyünü dəstəkləməyən Avropa ölkələrinə qarşı mövqeyi necə olmalıdır?

- Düşünürəm ki, Aİ bu dəfə bu ölkələrə həmişəki simpatiya ilə yanaşmalı deyil. Qeyd edim ki, mən Rusiyanın əleyhinə səs verərək Ukrayna ərazi bütövlüyünü dəstəkləyən ölkələrin sayından təəccübləndim. Mən çoxdandır düşünürəm ki, Ermənistan və Belarus Rusiyanın peyk ölkələrinə çevriliblər. Onların müstəqilliyi çox etibarsızdır və daha çox kağız üzərində mövcuddur. BMT-də müstəqil dövlətlər kimi təmsil olunsalar da, hər iki dövlət bir çox cəhətdən Rusiyadan asılıdır.

Bunları nəzərə alaraq, düşünmək olar ki, onların başqa cür səs vermək imkanları yox idi. İstənilən halda, Krımın anneksasiyası və Ukrayna böhranı Aİ-nin Şərq Tərəfdaşlığı siyasətində köklü dəyişikliklər aparmasının vacibliyini ortaya çıxarıb. Hələlik və qısamüddətli perspektivdə isə hamı üçün əsas məqsəd Rusiyanı dayandırmaqdır. Mənim narahatlığım ondandır ki, yalnız Ukrayna deyil, Baltikyani ölkələr də təhlükə altındadırlar.

- 2008-ci ildə Gürcüstanda baş verən Cənubi Osetiya və Abxaziya və ondan əvvəl Azərbaycanda Dağlıq Qarabağ münaqişəsi eyni ssenari üzrə qurulmuşdular. Krım hadisələri Aİ-nin Cənubi Qafqazda mövcud münaqişələrə yanaşmasını necə dəyişəcək?

- Bəli, oxşarlıq və paralellər mövcuddur. Cənubi Qafqazda vəziyyət Rusiyanı tam qane edir. Ermənistan Rusiyadan tamamilə asılıdır, Azərbaycan və Gürcüstan isə onun təsir və təzyiq zonasındadırlar. Buna görə də Azərbaycan və Ermənistanın Qarabağ münaqişəsinə həll tapmaması Rusiyanın xeyrinədir və biz bunu Kazanda da gördük. Bu, Hitlerin «parçala və hökm et» siyasətidir. Ona görə də konkret olaraq bu halda Rusiyanın cənuba tərəf deyil, daha çox qərbə tərəf yönəldiyini düşünürəm.

Demək istərdim ki, Şimali Qafqazda Rusiyaya qarşı proseslərin və islam fundamentalizminin baş qaldırdığı bir dönəmdə Rusiyanın Qərbi özündən uzaqlaşdırması çox irrasional qərardır. Bunun səbəbini başa düşməkdə çətinlik çəkirəm.

Bundan əlavə, Rusiya Krımın anneksasiyası ilə Çinə görülməmiş presedent verdi. Rusiyanın uzaq şərqində bir-iki milyon çinli yaşayır və onları sıxışdırırlar. Çin öz vətəndaşlarını qorumaq bəhanəsi ilə Rusiyaya təcavüz etmək hüququna malikdir. Rusiyanın buna hazır olduğunu düşünmürəm.

Moskva çox qəribə yerdir. Paytaxtı Sankt-Peterburqdan Moskvaya köçürmək yanlış addım idi. Sankt-Peterburqdan aparılan siyasət daha açıq idi.