Tehran Elm və Sənaye Universitetinin aerokosmik mühəndisliyi və peyk texnologiyaları üzrə magistr tələbəsi Ərfan Şükurzadə Qızılhasar həbsxanasına köçürülüb. Bu addım onun haqqında çıxarılmış edam hökmünün yaxın zamanda icra edilə biləcəyi ilə bağlı ciddi narahatlıq yaradıb.

VAXT.AZ Güney Azərbaycan “Telegram” kanallarına istinadən xəbər verir ki, o müstəntiqlə görüş bəhanəsi ilə kameradan çıxarılıb və daha sonra Qızılhasara aparılıb. Daha əvvəl onun işi üzrə edam hökmünün dayandırılması statusu olduğu bildirilsə də, qəfil köçürülmə və siyasi məhbuslarla bağlı əvvəlki təcrübələr riskin artdığına işarə edir.

1997-ci il təvəllüdlü Şükurzadə Təbriz Universitetinin məzunu və Tehran Elm və Sənaye Universitetinin magistr tələbəsi idi. O, peyklərin test, idarəetmə və mövqe müəyyənləşdirmə proqram təminatı sahəsində araşdırmalar aparırdı və magistr pilləsində birinci yerə layiq görülmüşdü.

Ərfan Şükurzadə 2025-ci ilin fevral ayında SEPAH tərəfindən “casusluq və düşmən ölkələrlə əməkdaşlıq” ittihamı ilə saxlanılıb. Hakimiyyət bu ittihamlarla bağlı ictimaiyyətə ətraflı məlumat verməyib.

İşə yaxın mənbələrin sözlərinə görə, o, 9 ay təkadamlıq kamerada saxlanılıb və məcburi etiraf almaq üçün işgəncə və ağır təzyiqlərə məruz qalıb. Onun edam hökmü yaxın zamanda Ali Məhkəmə tərəfindən təsdiqlənib.