Böyük Britaniya dondurulan Rusiya aktivlərindən gələn faiz gəlirləri müqabilində Ukraynaya 70 milyon funt sterlinq dəyərində 350 hava hücumundan müdafiə raketi göndərəcəyini açıqlayıb.

Böyük Britaniya Müdafiə Nazirliyindən verilən açıqlamada, Ukraynanın Rusiyaya qarşı hava hücumundan müdafiə sahəsində daha da böyük üstünlük əldə etməsi üçün 350 “Advanced” qısa mənzilli hava-hava raketi (ASRAAM) göndəriləcəyi bildirilib.

Açıqlamada, döyüş təyyarələrindən atılmaq üçün nəzərdə tutulan raketlərin yerdən atılması üçün işlərin 3 ayda tamamlandığı və raketlərin hərbi yük maşınlarının arxasındakı akkumulyatorlardan buraxıla biləcəyi bildirilib.

Raketlərin “Raven” kimi tanınan qısa mənzilli mobil hava hücumundan müdafiə sistemində istifadə ediləcəyi və daha əvvəl Ukraynaya təhvil verilən 8 “Ravens”ə əlavə olaraq daha 5 hərbi maşınının göndəriləcəyi qeyd edilib.

Ukraynaya göndəriləcək raketlərin dəyərinin 70 milyon funt-sterlinq olduğu vurğulanan açıqlamada, "Raketlər, fövqəladə gəlirlərin sürətləndirilməsi (ERA) planı çərçivəsində həbs qoyulan Rusiya aktivlərindən əldə edilən 70 milyon funt-sterlinqlik faiz gəlirindən istifadə edilərək maliyyələşdiriləcək", – deyilib.

Bəyanatda qiymətləndirmələri yer alan İngiltərə Baş naziri Keir Starmer, "Putinin qanunsuz və vəhşi müharibəsinin bədəlini Ukrayna deyil, Rusiya ödəməlidir. Həbs qoyulan Rusiya aktivlərindən əldə edilən gəliri Ukraynanın ehtiyac duyduğu hava hücumundan müdafiə sistemini təmin etmək üçün istifadə etməyimiz son dərəcə uyğun bir qərardır", – deyib.

Müdafiə naziri Con Hili Ukraynanın sülhü təmin etmək üçün ən güclü mövqeyə gətirilməsi lazım olduğunu vurğulayaraq, "Rusiyanın Ukrayna şəhərlərinə qarşı fərq qoymadan raket və pilotsuz təyyarələrlə hücumları Putinin sülhə ciddi yanaşmadığını göstərir. Ona görə də həbs qoyulan Rusiya aktivlərindən əldə edilən gəliri Ukraynanı bu qırğından qorumaq üçün istifadə etməkdə haqlıyıq”, – deyib.

Bəyanatda həmçinin Böyük Britaniyanın Ukraynaya 5 min raket vermək vədi də xatırladılıb.