Fransa Baş naziri Fransua Bayrou ölkənin artan borc böhranı fonunda genişmiqyaslı qənaət paketini açıqlayıb. Plana əsasən, sosial yardım artımları dondurulacaq, pensiyaçılara əlavə ödəniş edilməyəcək, minlərlə dövlət vəzifəsi ixtisar olunacaq və iki rəsmi bayram günü ləğv ediləcək.

Bayrou sərt bəyanatla çıxış edərək bildirib: “Fransa Avropanın ən çox borclanan ölkəsidir. Hər saniyə 5 min avro borclanırıq. Bu, bir millət üçün ölümcül təhlükədir. Daha çox işləməyə, daha az maaş almağa hazır olun”.

Sosial xərclər azaldılır, bayramlar ləğv edilir

Qənaət paketinə əsasən:

Sosial müavinətlərə artım edilməyəcək;

Pensiyalarda bu il heç bir indeksasiya nəzərdə tutulmur;

3 min dövlət vəzifəsi ixtisar olunacaq;

Hər üç təqaüdçünün yerinə yalnız bir yeni işçi qəbul ediləcək;

Pasxa bazar ertəsi və 8 May – Qələbə Günü kimi iki rəsmi tətil ləğv olunacaq.

Bayrou bu tədbirləri “əmək məhsuldarlığını artırmaq və büdcə nizam-intizamını təmin etmək” məqsədilə əsaslandırıb.

8 May qərarına etirazlar

Təklif olunan dəyişikliklər arasında 8 May Qələbə Gününün ləğvi xüsusilə böyük ictimai narazılıq doğurub.

İfrat sağçı Milli Birlik Partiyasının lideri Cordan Bardella bu qərarı “Fransız tarixinin təhqiri” adlandıraraq sərt tənqid edib və partiyasının bu təklifə qarşı çıxacağını bildirib.

Müdafiə və borc xərcləri artırılacaq

Bayrou açıqlamasında 2025-ci il büdcəsində bütün dövlət xərclərinin dondurulacağını, yalnız müdafiə sektoru və borc faizlərinin ödənişlərinin artırılacağını qeyd edib. Müdafiə büdcəsinin artırılması NATO öhdəlikləri və Rusiya təhlükəsi ilə əsaslandırılıb.

Fransa Milli Assambleyası hazırda yay tətilində olsa da, qənaət planı siyasi dairələrdə ciddi rezonans doğurub. Hökumətin parlamentdə sabit çoxluğa malik olmaması, müxalifətin birlikdə səsverməyə çıxacağı təqdirdə Bayrou kabinetinin süqutuna səbəb ola bilər.

Xatırladaq ki, Baş nazir əvvəllər iki dəfə etimadsızlıq səsverməsindən çətinliklə yayınmışdı. Bu dəfə isə həm sol, həm sağ müxalifətin ortaq mövqe sərgiləməsi real ehtimal kimi qiymətləndirilir.