3-cü Şuşa Qlobal Media Forumunun iştirakçıları Ağdam rayonuna və Xocalı şəhərinə səfər ediblər. Əvvəlcə Ağdam İmarət Kompleksini ziyarət edən qonaqlara burada yerləşən tikililər, türbələr, tarixi qəbiristanlıq, Qarabağ atlarının təqdimatı üçün atçılıq kompleksi və ziyarətçi mərkəzi barədə məlumat verilib. Bildirilib ki, interaktiv muzey kompleksində Cavanşirlər sülaləsinə dair məlumatlar, Qarabağ xanlığı haqqında tarixi faktlar, Xurşidbanu Natəvanın əl işlərinə və poemalarına həsr olunmuş audiovizual təqdimat, İmarət Kompleksinin işğal dövründə və işğaldan azad olunduqdan sonrakı vəziyyətini əks etdirən fotomateriallar nümayiş olunur.

Ağdam Dəmir Yolu və Avtovağzal Kompleksi ilə tanışlıq zamanı forum iştirakçıları bu infrastruktur obyektində yaradılan bütün zəruri otaqlar, həmçinin gözləmə zalları, bilet kassaları, kitabxana, mağazalar, əyləncə zonaları, restoran və istirahət guşələrinə baxış keçiriblər. Qeyd edilib ki, Azərbaycanda ilk qapalı dəmir yolu platforması məhz Ağdam Dəmir Yolu və Avtovağzal Kompleksində inşa olunub, uzunluğu isə 350 metrdir.

İştirakçılar Ağdam rayonunun Xıdırlı kəndinə səfər edərək burada aparılan bərpa-quruculuq işləri ilə tanış olublar. Qonaqlar kənddə inşa edilən zəruri müasir sosial infrastruktur barədə məlumatlandırılıb. Diqqətə çatdırılıb ki, kənddə əhalinin məşğulluğunun təmin edilməsi üçün hər cür şərait yaradılır, mədəniyyət və əyləncə mərkəzləri, müxtəlif təyinatlı müəssisələr, iqtisadi inkişaf obyektləri, təhsil, idarəetmə və kənd təsərrüfatı sahələri üzrə sakinlərin işlə təmin olunması nəzərdə tutulur.

Sonda forum iştirakçıları Xocalı şəhərinin mərkəzində olublar. Burada onlar şəhərin ümumi görünüşü, aparılan bərpa-quruculuq işləri ilə tanış olublar.