İlon Maskın sahibi olduğu “xAI” şirkətinin inkişaf etdirdiyi “Grok” söhbət botunda 370 mindən çox şəxsi söhbət internetdə qorunmasız şəkildə aşkarlandı; həssas məlumatlara giriş mümkündür.

“Forbes” jurnalının araşdırmasına görə, “Grok”dakı bu söhbətlər “Google” və “Bing” kimi axtarış motorları vasitəsilə əldə edilə bilirdi. Xüsusilə şifrələr, tibbi məlumatlar, psixoloji suallar kimi həssas məzmunun açıq olması ciddi narahatlıq yaradıb.

Məlumatların sızmasının səbəbi “Grok”un söhbət paylaşma funksiyasıdır. İstifadəçilər söhbətləri e-poçt və ya mesaj vasitəsilə paylaşarkən sistem unikal bir link yaradır. Lakin bu linklər axtarış motorları tərəfindən indeksləndiyi üçün söhbətlər hər kəs üçün əlçatan olur. Çox istifadəçi bunun fərqində deyildi.

Sızdırılan söhbətlərdə yalnız zərərsiz məlumatlar yox, eyni zamanda çox təhlükəli məzmunlar da var idi:

Fentanil və metamfetamin kimi qanunsuz maddələrin hazırlanma qaydaları

Bomba istehsalı ilə bağlı məlumatlar

Zərərli proqram təminatı hazırlama üsulları

İstifadəçilərdən biri tərəfindən paylaşılmış açıq şifrə

Yüklənmiş vizual fayllar

Tibbi və psixoloji intim suallar

Sızma yalnız adi istifadəçiləri deyil, həmçinin jurnalistlər və süni intellekt tədqiqatçılarını da əhatə etdi.

“OpenAI” oxşar sızmadan sonra “ChatGPT”də “Paylaş” funksiyasını axtarış motorlarında görünməz hala gətirmişdi. “xAI” tərəfindən isə hələlik rəsmi açıqlama verilməyib.