Asiya sessiyasında bu gün qiymətlər enişlə açıldı. Bazarlar həm Rusiya-Ukrayna sülh razılaşması ümidlərinin zəifləməsini, həm də ABŞ-ın Hindistana tətbiq etdiyi əlavə tariflərin təsirini qiymətləndirməyə çalışırdı.

Azərbaycan vaxtı ilə saat 01:52-yə olan məlumata görə, oktyabr fyuçersli “Brent” markalı neft 0,8% ucuzlaşaraq bir barel üçün 68,10 dollara, “WTI” markalı xam neft isə 0,7% geriləyərək 64,14 dollara düşüb.

Dünən ABŞ-da açıqlanan məlumatlar xam neft ehtiyatlarının gözləniləndən az azalmasını göstərsə də, qiymətlər günün sonunda təxminən 1% artımla bağlanmışdı. Lakin hər iki kontrakt “OPEC”in sabit istehsal artımları fonunda avqust ayını 6%-dən çox itki ilə başa vurmağa hazırlaşır.

ABŞ Prezidenti Donald Tramp ötən həftə Ukrayna Prezidenti Vladimir Zelenski və Rusiya Prezidenti Vladimir Putini Vaşinqtonun ev sahibliyi edə biləcəyi üçtərəfli sammitdən öncə birbaşa görüşməyə təşviq etmişdi. Ancaq tərəflərin mövqelərində yaxın perspektivdə ciddi irəliləyiş gözlənilmir.

Tramp ABŞ-ın hərbi qüvvə yerləşdirməsi istisna olmaqla təhlükəsizlik zəmanətləri təklif edib, amma görüşün tarixi və yeri müəyyən edilməyib.

Bu arada Rusiya Kiyevdə Avropa Birliyi missiyasının və “British Council”ın yerləşdiyi binalara ziyan vuran yeni hava hücumları həyata keçirib.

“ING” analitikləri qeydlərində, “Sülh razılaşması istiqamətində irəliləyişin olmaması, sanksiyalar və əlavə tariflərin neft bazarı üzərində risk yaratmağa davam etdiyi deməkdir”, – deyiblər.

***

ABŞ-ın Hindistanın Rusiya nefti idxalındakı aqressiv mövqeyinə cavab olaraq tətbiq etdiyi əlavə 25%-lik tarif avqustun 27-dən qüvvəyə minib. Bununla da ümumi gömrük rüsumu 50%-ə yüksəlib.

Bu addım Vaşinqtonun Ukrayna müharibəsi dövründə Hindistanın Moskva ilə enerji əməkdaşlığını məhdudlaşdırmaq üçün göstərdiyi daha geniş təzyiqin bir hissəsidir.

Hindistanın emal zavodları tariflərin tətbiqindən dərhal sonra Rusiya nefti alımını qısa müddət dayandırsa da, sonradan yenidən bərpa edib. Analitiklərin fikrincə, bu tədbirlər hələlik axınları məhdudlaşdırmaq üçün kifayət etmir.

Mütəxəssislər hesab edir ki, bazar yaxın vaxtlarda Rusiyadan Hindistana neft axınını diqqətlə izləyəcək.