ABŞ mənşəli bulud təhlükəsizlik şirkətinin hesabatına görə, 2025-ci ilin ilk yarısında dünyada 8 milyondan çox rəqəmsal hücum qeydə alınıb və bu hücumlardan ən çox təsirlənən bölgələrdən biri də Avropadır.

Hesabatda bildirilir ki, hücumların böyük qismi Almaniya, Fransa, Polşa, Rusiya və Səudiyyə Ərəbistanında telekommunikasiya şirkətlərinə yönəlib və əsasən 5-15 dəqiqəlik kəsintilərə səbəb olub. NETSCOUT-un məlumatına görə, Avropa, Yaxın Şərq və Afrika (EMEA) ölkələri bu il ərzində 3,2 milyon “DDoS” (paylanmış xidmətin rədd edilməsi) hücumuna məruz qalıb. Bu hücumlar müəyyən sistem və ya veb-sayta həddən artıq trafik göndərərək onun fəaliyyətini iflic etməklə həyata keçirilir.

Mütəxəssislərin sözlərinə görə, hakerlər bu hücumları süni intellekt vasitəsilə yönləndirirlər. Süni intellekt sistemləri müxtəlif internet provayderləri üzərindən hücumları yayaraq həm aşkarlanmaqdan yayınır, həm də təhlükəsizlik divarlarını daha asan dəf edir. Şirkətin bəyanatında qeyd olunur ki, DDoS hücumları artıq “kritik infrastrukturu sabitliyi poza biləcək geosiyasi təsir vasitəsinə” çevrilib və bu da qlobal miqyasda təşkilatlar üçün “misli görünməmiş kiber risk” yaradır.

NETSCOUT-un təhlükə kəşfiyyatı direktoru Riçard Hammel bildirib ki, “hacktivist” qruplar daha çox avtomatlaşdırmadan, paylaşılmış infrastrukturdan və inkişaf edən taktikalardan istifadə etdikcə, ənənəvi müdafiə mexanizmlərinin artıq kifayət etmədiyi açıq görünür.

Hesabatda həmçinin qeyd edilir ki, hakerlər hücumlarını koordinasiya etmək üçün “WormGPT” və “FraudGPT” kimi süni intellekt versiyalarından yararlanırlar. “FraudGPT” kimlik oğurluğu, fişinq e-poçtları yazmaq, parolları qırmaq və oğurlanmış kredit kartı məlumatlarını toplamaq üçün nəzərdə tutulub. Təhlükəsizlik analitiki Rakeş Krişnanın sözlərinə görə, bu sistemlə qısa, amma peşəkar görünən fişinq məktubları yazmaq olduqca asandır. “WormGPT” isə oxşar şəkildə rəhbərlərin kimliyinə bürünərək əməkdaşlardan pul və ya məlumat istənilən saxta məktubların hazırlanmasında istifadə olunur.

“Microsoft”un təhlükəsizlik komandası xəbərdarlıq edir ki, bu cür hücumlar şirkətlərə hər il milyonlarla dollar zərər vurur və xüsusən kiçik bizneslər üçün maliyyə baxımından bərpaolunmaz nəticələr doğurur.

NETSCOUT-un izləmə platforması hər gün on minlərlə aktiv və potensial DDoS hücumunu təhlil edir. Sistem eyni zamanda müxtəlif “botnet” şəbəkələrini və kirayə əsasında fəaliyyət göstərən DDoS xidmətlərini də izləyir. Mütəxəssislər hesab edirlər ki, İsveçrədə keçirilən Dünya İqtisadi Forumu Davos konfransı kimi qlobal tədbirlər də kiberhücumların artması üçün katalizator rolunu oynayır.

Bu ilin fevral və mart aylarında İtaliyada siyasi mübahisələr fonunda dövlət qurumlarına qarşı genişmiqyaslı DDoS hücumları baş vermişdi. Avropa xaricində isə Pakistan, Hindistan, İran və İsrail arasında gərginlik də ortalamanın üzərində kiberhücumlara səbəb olub. Hesabat göstərir ki, İran 13 iyundan bəri 15 mindən çox hücuma məruz qalıb, onların 2 800-dən çoxu isə cəmi bir gün ərzində baş verib.