Çin sürətlə böyüyən süni intellekt sektorunda həddindən artıq rəqabətin qarşısını alacağını açıqlayıb.

“Bloomberg”in məlumatına görə, ölkənin ən yüksək səviyyəli iqtisadi planlaşdırma qurumu hökumətin əyalətləri süni intellektin bir-birini tamamlayacaq və uyğun şəkildə inkişaf etdirilməsinə təşviq edəcəyini bildirib.

Milli İnkişaf və İslahat Komissiyasının (NDRC) rəsmisi Çjan Kailin (Zhang Kailin) məqsədlərinin hər bölgənin öz güclü tərəflərindən yararlanaraq böyüməni dəstəkləmək və səylərin təkrarlanmasının qarşısını almaq olduğunu qeyd edib.

“Biz mütləq nizamsız rəqabətə və ya hamı ardınca getsin yanaşmasına icazə verməyəcəyik”, – deyən Çjan inkişafın yerli üstünlüklər, resurslar və sənaye təməlinə əsaslanaraq həyata keçirilməli olduğunu vurğulayıb.

Çjanın sözləri Çin Prezidenti Si Cinpinin (Xi Jinping) keçən ay yerli idarələrin süni intellekt sahəsinə həddindən artıq sərmayə qoymasına qarşı etdiyi xəbərdarlığı xatırladır. Bu mesaj, hökumət rəsmilərinin elektrikli avtomobillərdə görülən həddindən artıq istehsalın yaratdığı deflyasion təzyiqlərin süni intellekt sektorunda təkrarlanmasını istəmədiyini göstərir.

Pekin süni intellekti dünyanın ikinci ən böyük iqtisadiyyatı üçün yeni bir böyümə mühərriki və ABŞ ilə rəqabətin kritik sahəsi kimi qiymətləndirir. Bu, həm dövlət, həm də özəl sektordan intensiv sərmayələri təşviq edir.

Hökumət bu həftə süni intellektin inkişafı, tətbiqi və idarə olunmasını sürətləndirməyə yönəlmiş bir fəaliyyət planı yayımlayıb.

Milli İnkişaf və İslahat Komissiyası planı detallandıraraq, milli səviyyədə daha yaxşı süni intellekt planlaşdırılması aparılacağını və özəl şirkətlərə daha çox dəstək veriləcəyini açıqlayıb. Məqsəd, “DeepSeek” kimi sürpriz uğur qazanan startapların sayının artmasına şərait yaratmaqdır.

Qeyd edilən şirkət bu il daha güclü və sərfəli süni intellekt modeli ilə qlobal miqyasda diqqət çəkmiş və Çində böyük süni intellekt həvəsi yaratmışdı.

“Bloomberg”in ayrıca təhlilinə görə, Çinli şirkətlər ölkənin qərb çöllərindəki məlumat mərkəzlərinə 115 mindən çox “Nvidia Corp.” süni intellekt çipinin quraşdırılmasını planlaşdırır.