“Formula 1”in “Emiliya-Romanya Sprint 2022”də hər şeyi ilə çox həyəcanlı yarış izlədik. Maks Ferstappen bu il növbəti dəfə Lekleri real mübarizədə keçdi və bu yöndə psixoloji üstünlüyü də əlinə aldı. Lekler hələ real mübarizədə onu keçə bilməyib.

Karlos Sayns minimum vəzifəni yerinə yetirdi və 4-cü oldu. Sabah üçün yaxşı yerdədir. Səhvini düzəltdi. Şarl Lekler təkərləri tez öldürür. Sabah da belə eləsə, Ferstappen oynaya-oynaya qazanar.

“Mercedes” isə əsl xəyal qırıqlığı yaşatdı. Axırıncı dəfə Azərbaycanda iki sürücü ilə xalsız qalmışdılar. Artıq pilotları çox geridə qalırlar. Bəlkə, yenilikləri işləsə, “Mühəndislər Kuboku”nda 2-ci olarlar, amma “Sürücülər Çempionatı”nda qələbə yavaş-yavaş əldən gedir.

Alonso da günün bəxtsizlərindən idi. Əvvəl ilişmə muftası işləmədi və heç nədən iki yer itirdi. Sonra da tempi çatmadı. Problemlər bu adamdan əl çəkmir.

Serxio Peres də eynilə Karlos Sayns kimi əla iş gördü. Sabah Ferrari və Red Bull arasında şahmat oyunu gedəcək.