Azərbaycan çempionu «Qarabağ»ın baş məşqçisi Qurban Qurbanov UEFA Çempionlar Liqasının pley-off mərhələsi çərçivəsində səfərdə Danimarka «Kopenhagen»inə qarşı keçirdikləri cavab oyununu (1:2, ilk oyun 1:0) şərh edib.

Səfər qolu sayəsində mərhələ keçən və yeni tarix yazan Azərbaycan çempionunun çalışdırıcısı «İdman Azərbaycan» kanalının canlı efirində fikirlərini bölüşüb. O, tarixi nəticəni belə şərh edib:

«Bu gün tək biz yox, bütün Azərbaycan xalqı qələbə arzulayırdı. Hər kəsi, bütün azərbaycanlıları təbrik edirəm. Düşünürəm ki, bu uğur ölkədə futbolun inkişafı üçün böyük bir təkan olacaq. Karyeramda belə bir məğlubiyyətə sevindiyimi xatırlamıram. Oyuna gəlincə, ilk hissədə çıxışımız pis alınmırdı, əsas diqqəti müdafiəyə ayımışdıq. Rəqib də pressinq edirdi. Çalışırdıq ki, təzyiqdən çıxaq və əks hücum quraq. Ev sahibi komanda istər-istəməz daha inamlı oynayır. Futbolçularım isə hər şeyə rəğmən əzmkar və soyuqqanlı oynadılar. Düşündüyümüz kimi alındı və pis olmadı».

Təcrübəli mütəxəssis yekunda transfer haqqında da danışıb: «Transfer mütləq etmək istəyirik. Çalışırıq ki, heç olmasa, 1-2  oyunçu gətirək. Artıq sabahdan bu haqda düşünməyə başlamalıyıq».