Amerika qitəsinin daha bir ölkəsində sol iqtidar dönəmi başa çatdı. Dünən Salvadorda keçirilən prezident seçkilərində 38 yaşlı Nayib Bukele 54 faiz səs alaraq ilk turda qalib gəlib. N.Bukele sağ mərkəzçi “Milli Birlik uğrunda Böyük Alyans”ın (Gran Alianza por la Unidad Nacional) namizədidir. Hakimiyyətdəki sol partiya - “Farabundo Marti adına Milli Azadlıq Cəbhəsi”nin namizədi Huqo Martinez 13 faiz səslə üçüncü olub.

Bu hadisə son illər Amerika qitəsində müşahidə olunan tendensiyanın davamıdır. 2010-cu ildən üzü bəri regionda sol hökumətlər domino daşı kimi bir-bir yıxılmağa başlayıb. Problemlər hər yerdə oxşardır: elitaların korrupsiyası, sosial-iqtisadi çətinliklərin artması, kriminogen durumun kəskinləşməsi.

Salvadordakı dəyişiklik Venesuela uzurpatoru Nikolas Maduroya daha bir zərbədir. Çünki Salvador qitədə Maduronu dəstəkləyən azsaylı dövlətlərdən biri idi. Bu ölkənin prezidenti Sançez Seren Maduronun bu il yanvarın 10-da keçirilmiş andiçmə mərasiminə də qatılmışdı.

N.Bukele seçki kampaniyası dövründə Venesueladakı hadisələrə münasibət bildirib və Maduronu diktator adlandırıb. O bildirib ki, sağçı və ya solçu olması fərq etmir, diktator diktatordur və onların hamısı qeyri-legitimdir.