Ananın övladına hər vəziyyətdə dəstək olub, qanadının altına alması qədər təbii bir şey yoxdur. Amma o uşaq dünyanın ən zəngin insanıdırsa və etdiyi hər şey sensasiyadırsa, xüsusən də ABŞ prezidentinin xüsusi müşaviridirsə, gözlər də anaya çevrilir. Təbii ki, söhbət Elon Maskın anası Meydən gedir. “Oğlum məşhurlaşmadan əvvəl məşhur idim” deyən Mey Maskın bu dəfə prezident helikopteri və təyyarəsi ilə səfəri səs-küyə səbəb olub.

ABŞ prezidenti Donald Tramp ötən həftə sonu Floridadakı Mar-a-Laqo otelindən Ağ Evə qayıdarkən onu qonaqlar müşayiət edib.

Əslində konvoy kifayət qədər izdihamlı olub. Məsələn, Melaniya Trampın atası Viktor Knavs sərnişinlər arasında imiş. Ancaq həqiqətən diqqəti çəkən şəxs prezidentin qayınatası deyil, üç nəsil – ana, oğul, nəvə Masklar idi.

İndi çoxsaylı titullarına "Prezidentin xüsusi müşaviri" adını əlavə edən texnologiya milyarderi İlon Mask oğlu X Æ A-12 (qısaca X) və anası Meyi də özü ilə götürüb, əvvəlcə prezident vertolyotu “Marine One”, sonra prezident təyyarəsi “Air Force One”, daha sonra isə başqa bir helikopterlə Trampla birlikdə Ağ Evə qayıdıb.