Mask Ağ Evi tərk edir. Dünyanın ən varlı adamı, işini bitirib “SpaceX” və “Tesla”ya qayıdacaq. Donald Tramp hökumətin effektivliyi departamentinin (DOGE) tezliklə bağlanacağını və Trampın komandasına xüsusi məsləhətçi kimi kömək edən Elon Maskın öz şirkətlərinə qayıdacağını təsdiqləyib. Onun dövlət qulluğunda 130 günlük məhdudiyyət var idi və bu müddət başa çatmaq üzrədir.

“Mən bunu mümkün qədər uzun müddət saxlayardım. O, çox istedadlı adamdır. Mən ağıllı insanları sevirəm və o, həqiqətən də ağıllıdır və yaxşı iş görür”, – deyə, Tramp Mask haqqında təəssüratını bölüşüb.

Əgər DOGE doğrudan da yığışdırılırsa, bu, çox böyük uğursuzluq və ya hiyləgər bir gediş ola bilər. Ya bütün bunlar Tramp və Maskın PR kampaniyası idi, ya da Maska, sadəcə olaraq, siyasi şou lazım idi.

Son zamanlar orda-burda milyarderə qarşı etirazlar baş qaldırır. ABŞ-da insanlar “Tesla”nı boykot edirlər, çünki Mask ölkənin idarə edilməsində “çox dərinə getmişdi”. Etirazlara görə iş adamının şirkətləri zərər çəkir. Çox ola bilər ki, Elon Mask “ziyanın yarısından qayıtmaq da kardır” düşüncəsi ilə vəzifədən istefa vermək fikrinə düşüb…