Güclü ixrac göstəricilərinin ölkənin iqtisadi artım perspektivini yaxşılaşdırmasından sonra Çin Mərkəzi Bankı (PBOC) yuanı yuxarı istiqamətə hərəkət etdirməyə başlayıb.

Bu vəziyyət, rəsmilərin daha güclü valyuta kursunu dəstəkləyən strateji dəyişikliklərə getdiyi barədə spekulyasiyaların ortaya çıxmasına səbəb olub.

PBOC bu həftə yuan üçün gündəlik referans kursunu təxminən bir ilin ən böyük artımı ilə yüksəldib. Dolların böyük ölçüdə sabit qalmasına baxmayaraq atılan bu addım, rəyçilər tərəfindən rəsmilərin yalnız güclü valyutadan narahat olmadığını, eyni zamanda tədrici bir dəyər artımı yaratmağı da hədəflədiyi kimi şərh edilib.

Bu addım, ilin əvvəlində ABŞ ilə tarif müharibəsində yuanı sabit saxlamağa çalışan Çin strategiyasında qismən tənzimləməyə işarə edir. Ticarət gərginliyinin azalması, iqtisadiyyata dair nikbin gözləntiləri gücləndirib və Çin səhm bazarlarında ralli yaradıb. Bu da bazardan valyutanın dəyər qazanması yönündə çağırışların artmasına səbəb olub.

“Bank of America”nın (Asiya) Valyuta və Faiz Strategiyaları üzrə rəhbər Klaudio Piron (Claudio Piron) bildirib: “Mərkəzi bank artıq daha rahat mövqedədir və kursda kiçik iki istiqamətli tənzimləmələrə icazə verə bilir. Bu, PBOC siyasətində normallaşmanın başlanğıcıdır”.

“BNP Paribas”dan Çi Lo da qeyd edib ki, “Dolların son dövrdə zəifləməsi PBOC-ə yuanı orta müddətli ticarət ağırlıqlı aralığa yönəltmək üçün fürsət pəncərəsi açır”.

Buna baxmayaraq, bəzi bazar ekspertləri, referans kurs tənzimləmələrinin PBOC-in geniş miqyaslı bir dəyər artımı istədiyi qənaətinə gəlmək üçün çox kiçik olduğunu düşünür.

Dolların hərəkəti, ticarət danışıqları və Çin-in ABŞ-a nisbətən aşağı faiz dərəcələri yuan üçün hələ də risk yaradır. BNP-dən Lo əlavə edib: “Pekin rəhbərliyi yuanı gücləndirməyə çalışıb, lakin PBOC-in kurs siyasəti hələ də sabit kurs saxlamaq üzərində qurulub”.