ABŞ-da cümə axşamı açıqlanan güclü iqtisadi artım göstəricisi “Wall Street” səhm indekslərini bütün zamanların ən yüksək səviyyəsinə daşıdı. “S&P 500” indeksi 0,32% artaraq 6 501,86 bəndə çatdı və rekord qırdı. “Nasdaq 100” isə 0,58% yüksəldi.

İndi bazarlar ABŞ-da açıqlanacaq və FED-in üstünlük verdiyi inflyasiya göstəricisi hesab olunan əsas PCE (xalis xərclər üzrə qiymət indeksi) məlumatlarını gözləyir.

ABŞ fyuçers indeksləri hazırda azalmaqdadır. Dünən 0,30% düşən “Bloomberg Dollar Index” bu səhər sabit qalıb. Sidneydəki “National Australia Bank”ın baş strateqi Rodriqo Katril (Rodrigo Catril) PCE məlumatından böyük bir sürpriz gözləmədiyini, lakin göstəricinin FED rəsmisi Uollerin açıqlamalarına baxmayaraq inflyasiyada “sabitlik” olduğunu göstərməsinin ehtimal olunduğunu bildirib.

Katrilin fikrincə, ay sonu portfel balans tənzimləmələri cümə günü günün sonrakı saatlarında daha dominant rol oynaya bilər və avqust ayının ABŞ səhm bazarı üçün yaxşı keçdiyi nəzərə alınarsa dollar satışlarını stimullaşdıra bilər. Asiyada səhər səhm bazarları qarışıq mənzərə nümayiş etdirib.

Yapon səhm bazarları Tokio inflyasiya məlumatlarının ardından düşüb, Çin və Honq-Konq bazarlarında isə güclü yüksəliş müşahidə olunub.

“Goldman Sachs” strateqləri, dəyərləndirmələr, mənfəət artım proqnozları və müsbət bazar mövqelərini əsas gətirərək, Çin “CSI 300” indeksinin 12 aylıq hədəfini 4 500-dən 4 900-ə yüksəldib. Buna qarşı, “Morgan Stanley” strateqləri daha ehtiyatlı yanaşaraq, bazarın həddindən artıq qızmağa başladığına dair əlamətlərə diqqət çəkib.

Neft bazarı isə yaxın gələcəkdə qlobal təklifin tələbi üstələyəcəyi və ehtiyatların artacağı narahatlıqları ilə avqust ayını itki ilə tamamlamaq üzrədir.

Noyabr təslimatlı “Brent” nefti barrelinə görə 68 dollardan ticarət olunur və bu ay təxminən 5% ucuzlaşıb. “WTI” isə 64 dollara doğru enir. Neft bazarları həmçinin Ukrayna-Rusiya müharibəsinə dair xəbərlərə də fokuslanıb.

Ağ Ev Mətbuat katibi Kerolayn Livitt (Karoline Leavitt) ABŞ Prezidenti Donald Trampın (Donald Trump) müharibə ilə bağlı son vəziyyəti açıqlayacağını bildirərkən, Almaniya Kansleri Fridrix Merz (Friedrich Merz) Ukrayna Prezidenti Vladimir Zelenski ilə Rusiya Prezidenti Vladimir Putin arasında görüşün mümkün görünmədiyini bildirib.

Yatırımçılar kritik əsas PCE göstəricisini gözləyərkən, qızıl bu gün mənfi istiqamətdə hərəkət etsə də, fasiləsiz ikinci həftəlik yüksəlişini qeyd etməyə hazırlaşır.

ABŞ iqtisadiyyatının gözləniləndən sürətli böyüdüyünü göstərən məlumatların ardından, qızılın unsiyası bu səhər Asiyada 3 400 dollar üzərində ticarət olunub. Qızıl apreldə 3 500 dollarla rekord vurmuşdu.

ABŞ artım göstəriciləri, yaxın vaxtda açıqlanacaq əsas PCE məlumatından əvvəl inflyasiya ilə bağlı narahatlıqları artırıb. Bu isə FED-in faiz endirmə imkanlarını məhdudlaşdıra və faiz gətirməyən qızıl üçün adətən mənfi təsir göstərə biləcək bir vəziyyət yarada bilər.