“InvestAZ” İnvestisiya şirkətinin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.

Avro

Dünya valyuta birjalarında avro 1.1830$-a kimi də bahalaşdıqdan sonra ucuzlaşmağa başlayıb. Hal-hazırda 1.1800 dolların altında ticarət edilən EUR/USD məzənnəsi 1.1750 dolları da aşağı istiqamətdə qırarsa, 1.1700 və 1.1670 dollara kimi də ucuzlaşa bilər.

Eyni zamanda, çərşənbə axşamı Bakı vaxtı ilə saat 16:30, çərşənbə günü saat 22:00, cümə axşamı saat 15:45 və cümə günü saat 13:00-da müvafiq olaraq açıqlanacaq ABŞ-dan inflyasiya, Amerika Mərkəzi Bankının faiz qərarı, Avropa Mərkəzi Bankının faiz qərarı və Avrozonada inflyasiya göstəriciləri fonunda bu həftə güclü hərəkətlilik gözlənilir.

 Funt-sterlinq

Funt-sterlinq/dollar (GBP/USD) məzənnəsi də ucuzlaşır. Təhlillərə əsasən, hal-hazırda 1.34 dollara ticarət edilən GBP/USD məzənnəsi 1.3380 dolları da aşağı istiqamətdə qırarsa, 1.3300 dollara kimi də dəyər itirə bilər.

Çərşənbə axşamı və çərşənbə günləri müvafiq olaraq saat 12:30-da dərc ediləcək İngiltərənin əmək bazarı və inflyasiya ilə bağlı önəmli fundamental məlumatları da investorların diqqət mərkəzindədir.

Türk lirəsi

Türkiyə bazarlarında dollar 4.68TL-ə kimi bahalaşdıqdan sonra 4.45TL-ə kimi ucuzlaşıb və 4.38 və 4.33TL-ə kimi də ucuzlaşa biləcəyi proqnozlaşdırılır.

Ramazan bayramı ilə əlaqədar olaraq cümə axşamı və cümə günləri Türkiyə maliyyə bazarları işləməsə də dünya birjalarında dollar/lirə məzənnəsində də bu həftə güclü hərəkətlilik müşahidə edilə bilər.

Neft

Enerji bazarlarında isə 76.00 dollara ticarət edilən “Brent” nefti qiymətinin texniki analizlərə əsasən, 75.24 dolları da aşağı istiqamətdə qırılarsa, eniş dalğası 73.80 dollara kimi sürətlənə bilər. Bu həftənin çərşənbə günü saat 18:30-da yayımlanacaq ABŞ-ın neft ehtiyatları ilə bağlı statistik məlumatların da qiymətə güclü təsir edəcəyi gözlənilir.

Qızıl

Əlvan metallar bazarlarında qızılın gələcək qiymət tendensiyası fonunda qeyri-müəyyənlik müşahidə edilir. Bir unsiya üzrə qiymət artıq təqribən bir aydır 1290 (41.4 $/qram) və 1305$ (41.9 $/qram) aralığında dalğalanmaqdadır. Lakin təhlillərə əsasən, ABŞ-da inflyasiya yenidən güclənərsə, bu, qızıl qiymətlərinin də 1315 dollara (42.2 dollar/qram) kimi dəyər qazanmasına səbəb ola bilər. Bunun üçün isə 1305$-ın yuxarı istiqamətdə qırılmasını gözləmək lazımdır.

“İnvest-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikası Maliyyə Bazarlarına Nəzarət Palatası tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.

Risk bildirişi

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İnvest-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.