ABŞ Prezidenti Donald Tramp bütün avtomobil idxalına 25 faiz rüsum tətbiq etdikdən sonra, ticarət müharibəsinin genişlənməsi ilə bağlı narahatlıqlar investorları təhlükəsiz aktivlərə sövq edir.

Bu gün səhər 0,7 faiz bahalaşan qızılın qiyməti bir unsiya üçün 3077 dolları keçərək bütün zamanların ən yüksək səviyyəsinə çatıb. Qiymətli metal həftəlik ardıcıl dördüncü qazancını əldə edərək denən qeydə alınan rekordu üstələyib.

Tramp dünən avtomobil idxalına tarifləri rəsmən təsdiqləyəndən sonra AB və Kanadanın Birləşmiş Ştatlara iqtisadi zərər vurmaq üçün birləşsələr, daha sərt sanksiyalarla üzləşəcəkləri barədə xəbərdarlıq edib. Bazarlar həmçinin aprelin 2-də qüvvəyə minəcək yeni ticarət vergilərinə hazırlaşır. Ağ Ev qarşılıqlı tariflər tətbiq edəcəyini bildirsə də, planın tam əhatə dairəsi hələ dəqiqləşdirilməyib.

Qızıl bu il təxminən 16 faiz dəyər qazanıb və ən azı 15 dəfə rekord yeniləyib. Geosiyasi və iqtisadi qeyri-müəyyənliklər fonunda mərkəzi bankların ağır alışları və investorların təhlükəsiz aktivlərə tələbi qızıl qiymətlərini dəstəkləməyə davam edib. Bu amillər ABŞ Federal Ehtiyat Sisteminin bu il faiz dərəcələrini cəmi iki rüb bəndi azaldacağına dair bazar gözləntilərinə baxmayaraq, qızılın güclü qalmasına kömək edib. Aşağı faiz dərəcələri çox vaxt faizsiz qızılı daha cəlbedici edir.

Böyük banklar qızılın qiymət proqnozlarına yenidən baxıblar. “Goldman Sachs” bu həftə ilin sonuna qiymət proqnozunu bir unsiya üçün 3300 dollara qaldırıb. Bank bu artımın əsas səbəbləri kimi mərkəzi banklardan yüksək tələbat və qızılla dəstəklənən birja fondlarına (ETF) güclü axını göstərib.

Bu arada, gümüş 2012-ci ildən bəri ən yüksək səviyyəyə yaxınlaşır. Sinqapur vaxtı ilə saat 10:27-ə olan məlumata görə, spot qızıl 0,6 faiz bahalaşaraq bir unsiya üçün 3,076,92 dollara satılaraq həftəlik qazancını 1,8 faizə çatdırıb. “Bloomberg” Dollar Spot İndeksində gümüş, platin və palladiumun qiyməti bir qədər yüksəlib.