Trampın tarif “müharibələri” bu gün dünyada bir nömrəli müzakirə olunan məsələdir. ABŞ prezidenti nədən bu addımları atır – bir neçə səbəb var.

1. ABŞ bankrot olmaq ərəfəsindədir, “psevdo-sol”və qlobalist hakimiyyətlər (partiya mənsubiyyətindən asılı olmayaraq) Reyqandan sonra ABŞ-ı indiki vəziyyətə gətirdilər. Borc 36 trilyon 600 milyard dolları keçib. Hər il ABŞ borclar üzrə tək faizlərə 2 trilyon dollar ödəməlidir. Reyqandan sonrakı hökumətlər ancaq pul çap edərək borcu həm şişirdib, həm də faizləri qaytarırdılar. Belə yanaşma sonsuza qədər ola bilməzdi – Tramp indi pislə, çox pis arasında seçim etdi, çox pis ABŞ-ın bankrot olması, ardınca da bütün dünyanı uzun illərə yayılan iqtisadi tənəzzülə düçar etməsi olardı, pis isə indi ABŞ iqtisadiyyatı bir az daralacaq, qiymətlər bir az yüksələcək, amma, yeni tariflərdən büdcəyə 1,2 trilyon, Maskın fəaliyyəti ilə isə büdcəyə ildə 1 trilyon dollar qənaət ediləcək ki, bu vəsait də borcu artırmadan faizləri ödəməyə, hətta yavaş-yavaş borcu azaltmağa xidmət edəcək,

2. Tariflər orta-uzun vədədə qalacaqsa, istehsalın yenidən ABŞ-a dönməsinə səbəb olacaq, bu isə yeni iş yerləri, yeni istehsal gücləri deməkdir,

3. Tariflər istənilən ölkə ilə danışıqlar üçün vasitədir, əvvəl ABŞ “artistlik” edərək ölkələrə “insan haqları, demokratiya” deyib öz maraqlarına görə güzəşt qoparıb sonra “dəyərləri” unudurdular, indi isə “demokratiya dəyənəyini” daha səmimi və açıq olan tarif “dəyənəyi” ilə əvəz edirlər.

Tramp Azərbaycana da 10 faiz tarif tətbiq edib, gün ərzində bir neçə media qurumu bununla bağlı açıqlama istəyiblər, hətta həyəcanlı suallar da verirdilər.

2024-cü ildə Azərbaycan ABŞ cəmi 135 milyon dollarlıq mal ixrac edib, indi 10 faiz artsa, bu əlavə 13,5 milyon dollar edir ki, ölkə üçün təsirsizdir. ABŞ-dan ölkəmizə idxal isə 1 milyard 617 milyon dollardır, böyük rəqəmdir, biz “güzgü” yanaşması ilə eyni 10 faiz tətbiq etsək, ABŞ-dan əlavə büdcəyə 161 milyon dollar vəsait cəlb edə bilərik. Amma, hökumət buna getməyəcək, həm münasibətləri korlamazlar.