Dünya həftəyə iqtisadi xaosla başladı. ABŞ prezidenti Trampın elan etdiyi tariflər səbəbiylə bazarlar təxminən 2 trilyon dollar dəyər itirərkən, “Möhtəşəm yeddilik” səhmləri həftəyə kəskin enişlə başladı.

ABŞ prezidenti Donald Trampın açıqladığı tariflərdən sonra “Möhtəşəm yeddilik” adlandırılan böyük texnologiya şirkətlərinin bazar dəyəri sürətlə aşağı düşür.

“Apple”, “Google” və “Microsoft” kimi şirkətlər 2024-cü ilin sonunda pik həddə çatdıqdan sonra bazar dəyərini 6 trilyon dollardan çox itiriblər.

Tramp bazar günü rüsumları ikiqat artıraraq, investorların bunun nəticələrini çəkməli olduğunu deyib və Çinlə ticarət danışıqlarını hələlik dayandırıb.

“Apple”, “Alphabet” və “Microsoft” səhmləri son bir ilin minimumlarına yaxındır, “Apple” 4,8 faiz, “Möhtəşəm yeddilik”in digər üzvləri isə 1,5 faizlə 4,8 faiz arasında ucuzlaşıb. Tesla səhmləri 7 faiz ucuzlaşaraq 223 dollara enərək, onu “Möhtəşəm yeddilik” arasında ən böyük itkiyə məruz qalan şirkət etdi.

***

“Wedbush” analitiki Dan Ayves bildirib ki, “Apple” Çində yığılan “iPhone”lara görə ABŞ tariflərinə ən çox məruz qalan texnologiya şirkətidir. Ayves, ticarət müharibəsinin “Tesla”nın mövcud çətinliklərini daha da dərinləşdirəcəyini, baş direktor Elon Maskın Trampa və Avropadakı ifrat sağa dəstəyi ilə brendin zədələndiyini söylədi.

Ayves “Tesla” üçün qiymət hədəfini də 550 dollardan 315 dollara endirib. Bu rəqəm hələ də səhm qiymətindən təxminən 100 dollar yüksək olsa da, bu, onun əvvəlki optimist proqnozundan əhəmiyyətli dərəcədə aşağı düşür.

***

“Apple” üçün hədəf qiymətini 75 dollar azaldaraq 250 dollara endirən Ayves tarifləri “tam bir fəlakət” adlandırıb. Bu vergilər şirkəti yüksək mənfəət marjasını saxlamaq üçün ABŞ-da “iPhone” qiymətlərini qaldırmağa məcbur edə bilər.

“Apple”, Trampın ilk dövründə Çinə tətbiq edilən tariflərdən azad edildi. Lakin ABŞ-ın 500 milyard dollarlıq sərmayəsini elan etməsinə baxmayaraq, bu dəfə də eyni azadlığı alıb-almayacağı bəlli deyil.

“Apple” illərdir ki, “iPhone Pro” modelinin başlanğıc qiymətini 1000 dollar səviyyəsində saxlayır. “ABŞ-da “iPhone” istehsalı ideyası 1000 dollar qiymət nöqtəsində bizim üçün qeyri-realdır. Qiymət o qədər kəskin artacaq ki, bu barədə düşünmək belə çətindir”, – Ayves deyib.

***

“Tesla” cəbhəsində Ayves, ilin birinci rübündə zəif çatdırılma hesabatından sonra şirkətin satışlarının bu il azalmağa davam edə biləcəyini söyləyib. Ticarət gərginliyinin çinli alıcıları yerli markalara doğru sövq edə biləcəyini vurğulayan Ayves, “Trampın Çindəki tarif siyasətlərinin və Mask ilə eyniləşməsinin təsirlərini qiymətləndirməmək olmaz. Bu, çinli istehlakçıları BYD kimi yerli markalara sövq edəcək”, – deyib.