ABŞ prezidenti Donald Trampın ikitərəfli gömrük tarifləri qüvvəyə minməsi ilə qızıl qiymətləri də artıb. Qızıl əvvəlki seanslarda görülən rekord səviyyələrdən geri çəkilsə də, ABŞ prezidenti Donald Trampın ikitərəfli tariflərindən sonra yenidən yüksəlməyə başlayıb.

Yeni ticarət günündə qızılın unsiyası 1 faizə yaxın artıb. Qızılın unsiyası 3035 dolları sınaqdan keçirib. Son qiymətlərlə, ilin əvvəlindən qızılın unsiyası 15 faizdən çox artıb.

“Qızılın bərpası, tarif təhdidləri və qlobal ticarət normalarının potensial yenidən formalaşdırılması ilə bağlı artan investor narahatlığını əks etdirir,” – “Oversea-Chinese Banking Corp.”un valyuta strateqi Kristofer Vonq bildirib. Vong qeyd edib ki, qızıl daha nizamsız qlobal iqtisadiyyata qarşı yaxşı qoruyucu olaraq qalır.

ABŞ Prezidenti Donald Trampın 10 faizlik baza dərəcəsindən yüksək olan və təxminən 60 ölkəyə tətbiq edilən qarşılıqlı gömrük rüsumları bu gün səhər saatlarında qüvvəyə minib. Çinin cavab tədbirindən sonra Tramp bu ölkəyə əlavə 50 faiz tarif elan edib. Belə ki, Çindən idxal olunan məhsullara tətbiq olunacaq gömrük rüsumunun dərəcəsi bu gün səhər saatlarında 104 faiz olaraq qüvvəyə minib. ABŞ prezidenti tariflərin tətbiqinə qədər vaxtını ABŞ müttəfiqləri ilə danışıqlara sərf edib.