Almaniyada hər il təxminən 10,8 milyon ton ərzaq tullanır. Bu, adambaşına orta hesabla 131 kiloqrama uyğundur. Bu, ehtiyacı olanlara kömək edən təşkilatlar, xüsusən də “Tafel” kimi ərzaq bankları üçün böyük problem yaradır. Federal ştatlar bu israfı azaltmaq və yardıma yönəldilə bilən qida miqdarını artırmaq üçün yeni addımlar atmağa hazırlaşır.

***

Bu məsələ mayın 21-də Berlin hökumətinin sədrliyi ilə paytaxtda başlayacaq İstehlakçıların Hüquqlarının Müdafiəsi Nazirləri Konfransında (VSMK) müzakirə olunacaq. Ədalət və istehlakçıların hüquqlarının müdafiəsi üzrə Berlin senatoru, Felor Badenberq (CDU), “B.Z.” qəzetinə “Hazırda kommersiya sektoru üçün ərzağı atmaq onu bağışlamaqdan daha asandır və daha az xərclidir. Bu, bürokratik maneələr və vergi qeyri-müəyyənlikləri ilə əlaqədardır. Biz bu vəziyyəti təcili olaraq dəyişdirmək istəyirik", – deyib.

Senator VSMK çərçivəsində iki ərizə təqdim etməklə bu problemi həll etməyi qarşısına məqsəd qoyub. Qanuni maneələrin aradan qaldırılması və böyük ictimai bazarların “qida xilasetmə mərkəzləri”nə çevrilməsi təklif olunur.

***

Konfransdan əvvəl Berlində vətəndaş cəmiyyətinin, hüquq ekspertlərinin, alimlərin və ticarət nümayəndələrinin iştirakı ilə dəyirmi masa keçirilib. “Biznesin ianə verərkən hüquqi müəyyənliyə və ƏDV-dən azad edilməsinə ehtiyacı var. Hazırda Federal Maliyyə Nazirliyinin yalnız sirkulyarıdır ki, bu kifayət deyil”, – Badenberq bildirib.

Çünki kommersiya məqsədi ilə atılan ərzaqlara ƏDV tətbiq edilməsə də, hədiyyə edilən ərzaqlara görə bəzi hallarda vergi öhdəliyi yarana bilər. Bundan əlavə, müəssisələr bağışlanan məhsulların yeməli olduğunu sübut etmək üçün əhəmiyyətli səylər göstərməlidirlər. Məsələn, bir ərzaq mağazası bananları Tafelə bağışlayırsa, o, meyvələrin istehlaka yararlı olduğunu sənədləşdirməlidir və bu proses “Tafel” tərəfindən yenidən işlənir.

***

Badenberq bu ikiqat yoxlamanın aradan qaldırılmasını və yalnız alıcı təşkilat tərəfindən həyata keçirilməsini tövsiyə edir. “Məqsədimiz qida təhlükəsizliyinə xələl gətirmədən qida ianələri ticarəti ilə bağlı məsuliyyət riskini minimuma endirməkdir. Biz kommersiya müəssisələrinin üzərinə əlavə xərclər və risklər qoymamalıyıq", – deyib.

Tullantıları azalda biləcək başqa bir addım etiketləmə tələbini yüngülləşdirməkdir. Məsələn, çiyələkli qatıq səhvən qaragilə kimi qeyd olunubsa, bu, yenidən etiketlənməyə ehtiyac olmadan “Tafel”dəki məlumat posteri ilə düzəldilə bilər.

***

Bununla belə, tullantılar təkcə ticarət sferasında deyil. Atılan qidaların yarıdan çoxu ev təsərrüfatlarında olur. “Biz daha çox məlumat verməliyik və insanlara başa salmalıyıq ki, son istifadə tarixi məhsulun ertəsi gün xarab olacağı anlamına gəlmir. Qidaya daha çox qiymət vermək lazımdır”, – Badenberq bildirib.