Qızıl ehtiyatlarını ABŞ-da saxlayan Almaniya və İtaliyada ictimaiyyət qızıllarının qaytarılıb-qaytarılmaması məsələsini müzakirə edir və hökumətə təzyiqlər artır.

Dünya Qızıl Şurasının məlumatına görə, Almaniya və İtaliya müvafiq olaraq 3,352 metrik ton və 2,452 ton ilə ABŞ-dan sonra dünyada ikinci və üçüncü ən böyük qızıl ehtiyatlarına malikdirlər.

Hər iki ölkə qızıllarının üçdə birindən çoxunu ABŞ-da saxlayaraq Nyu-York “Fed”ə çox güvənir. Hesablamalara görə, onların Nyu-York “FED”də saxlanılan qızıllarının ümumi bazar dəyəri hazırda 245 milyard dollardan çoxdur.

Alman-İtalyan siyasətçisi və Almaniyanın Sol Partiyasından keçmiş Avropa Parlamentinin üzvü, hazırda solçu populist BSW partiyasına qoşulan Fabio De Masi verdiyi müsahibədə qızılın Avropaya və ya Almaniyaya geri qaytarılmasını dəstəkləmək üçün “güclü səbəblərin” olduğunu deyib.

Ölkələrin qızıllarını ABŞ-da saxlamasının əsas səbəblərindən biri Londonla yanaşı Nyu-Yorkun da dünyanın ən mühüm qızıl ticarət mərkəzlərindən biri olmasıdır.

Qızılın geri qaytarılması ictimai müzakirədir

“Financial Times” qəzetinin yazdığına görə, qızılın geri qaytarılması təklifi Almaniyada həm sol, həm də sağçı siyasi partiyalardan dəstək alır. Xristian Sosial Birliyinin (CSU) üzvü Piter Qauveyler vurğulayıb ki, Almaniya Mərkəzi Bankı (Bundesbank) ölkənin qızıl ehtiyatlarını qorumaq üçün “tələsik” hərəkət etməməlidir.

Qauveyler mövzu ilə bağlı açıqlamasında, “Son on ildə xaricdə qızılın saxlanmasının daha təhlükəsiz və sabit hala gəlib-gəlmədiyi sualını həll etməliyik. Cavab aydındır “YOX!”. Çünki geosiyasi risklər dünyanı daha az təhlükəsiz bir yerə çevirir”.

Avropa Vergi Ödəyiciləri Assosiasiyası da bu yaxınlarda Almaniya və İtaliyanın maliyyə nazirliklərinə mesaj göndərərək, onların mərkəzi banklarını qızıl anbarı kimi ABŞ-a etibar etmələrini yenidən nəzərdən keçirməyə çağırıb.

Trampın FED-in müstəqilliyinə müdaxiləsindən dərin narahatlıq duyduqlarını ifadə edən Assosiasiya prezidenti Yaqer, “Bizim tövsiyəmiz budur ki, Almaniya və İtaliya qızıllarını ölkələrinə qaytarsınlar və Avropa Mərkəzi Bankının (AMB) bu qızıl üzərində nəzarəti təmin etsinlər”.

İtaliyanın baş naziri Corca Meloni aprel ayında Vaşinqtonda Trampla görüşməzdən əvvəl baş nazirin adaşı, məşhur iqtisadi şərhçi Corca Meloni yerli qəzetdə yazırdı: “İtaliyanın qızıl ehtiyatlarının 43 faizini etibarsız Tramp administrasiyasına buraxmaq ölkənin maraqları üçün çox təhlükəlidir”.