Qızıl, ticarət danışıqlarında irəliləyişin təhlükəsiz liman kimi qəbul edilən aktivlərə olan tələbi azaltması fonunda ucuzlaşmaqda davam edir.

Külçə qızılın bir unsiyası 3.375 dollara qədər geriləyib. Bu, əvvəlki sessiyada qeydə alınan 1,3 faizlik enişdən sonra da zəifləmənin davam etdiyini göstərir.

“Bloomberg News”un xəbərinə görə, Avropa Birliyi ABŞ-a göndərilən məhsulların əksəriyyəti üçün 15 faiz rüsum tətbiqini qəbul etməyə hazır ola bilər. Bu addım, Yaponiya ilə əldə edilən bənzər bir razılaşmanı izləyir. Yaponiya 550 milyard dollarlıq investisiya öhdəliyi ilə razılaşmanı təmin etmişdi. Ticarət sahəsindəki bu irəliləyiş ABŞ dövlət istiqrazlarının gəlirlərini artırıb. Bu isə faiz gəliri olmayan qızıl üzərində təzyiq yaradır.

Bununla belə, müsbət hava ABŞ Prezidenti Donald Trampın hələ razılıq əldə etməmiş Cənubi Koreya və Hindistan kimi ölkələrə qarşı 15–50 faiz arasında rüsum tətbiq edəcəyi ilə bağlı təhdidlərini davam etdirməsi ilə kölgələnib. İnvestorlar, həmçinin Çin ilə aparılan danışıqların gedişatı barədə daha çox aydınlıq gözləyir.

Digər tərəfdən, pul bazarları ABŞ Federal Ehtiyat Sisteminin (FED) gələn həftə keçiriləcək iyul iclasında faiz dərəcələrini dəyişməz saxlayacağını proqnozlaşdırır. Lakin investorlar oktyabra qədər azı 0,25 faiz bəndi dərəcə endirimi ehtimalını qiymətləndirir – sentyabr iclasında endirim ehtimalı təxminən 60 faiz səviyyəsindədir.

Bakı saatı ilə 07:22-də spot qızıl 0,3 faiz ucuzlaşaraq bir unsiya üçün 3.378,76 dollara düşüb. “Bloomberg Dollar Spot İndeksi” isə 0,1 faiz azalıb və həftənin əvvəlindən bəri 1 faizdən çox dəyər itirib. Gümüş, dünən 2011-ci ildən bəri ən yüksək səviyyəyə çatdıqdan sonra yenə ucuzlaşıb. Platin və palladium da dəyər itirib.