Qızılın qiyməti, ABŞ ilə Avropa İttifaqı arasında gömrük tarifləri ilə bağlı əldə olunan razılaşmanın ardından sabitləşib. Bu inkişaf, iki əsas iqtisadi güc arasında kəskin bir ticarət müharibəsinin baş verə biləcəyi ilə bağlı narahatlıqları bir qədər aradan qaldırıb.

Qızılın bir unsiya üçün qiyməti həftəlik 0,4 faiz azaldıqdan sonra 3.340 dollar səviyyəsinin altında qalmaqda davam edir. Sərmayəçilər, Avropa Birliyinin avtomobillər də daxil olmaqla bir çox ixrac məhsuluna 15 faizlik gömrük rüsumu tətbiq olunacağı bu razılaşmanın qlobal iqtisadi mənzərəyə təsirlərini qiymətləndirməyə çalışır. Lakin razılaşmanın detallarının – xüsusilə metal bazarına təsirinin – qeyri-müəyyən qalması, tətbiq mərhələsində çətinliklərin ola biləcəyinə işarə edir.

Avqustun 1-i son tarix yaxınlaşdıqca bir çox ölkə hələ də ABŞ ilə razılaşma əldə etməyə çalışır. İnvestorlar isə xüsusilə Çin ilə aparılan danışıqlarda əldə olunan irəliləyişlərə dair daha aydın məlumat gözləyir.

Bununla yanaşı, bazarlar və iqtisadiyyat üçün ilin qalan dövrünə istiqamət verəcək önəmli bir həftəyə də daxil olunur. ABŞ Federal Ehtiyat Sisteminin (FED) bu həftə faiz dərəcələrini sabit saxlaması gözlənilir. Lakin investorlar, FED-in açıqlamalarında monetar siyasət xəritəsinə dair işarələri diqqətlə izləyəcək.

Hazırda spot bazarda qızıl, Bakı vaxtı ilə saat 10:25-də bir unsiya üçün 3.339,30 dollar səviyyəsinə qədər 0,1 faiz bahalaşıb. “Bloomberg Dollar İndeksi” isə 0,2 faiz artıb. Gümüş, ETF-lərdə (birja investisiya fondları) artımla birlikdə dəyər qazanıb. Platin və palladium qiymətlərində də artım müşahidə olunub.