Ötən həftə “Financial Times” qəzetinin 31 iyul tarixli bir sənədə əsaslanaraq verdiyi xəbərdə, ABŞ-ın Gömrük və Sərhəd Mühafizəsi Agentliyinin 1 kilo və 100 unsiya qızıl külçələrinin gömrük rüsumuna tabe gömrük kodu altında təsnif edilməli olduğunu bildirdiyi qeyd olunmuş, xəbərdən sonra qızıl qiymətləri yüksəlişə keçmişdi.

Vaxt.az xəbər verir ki, ABŞ hökuməti isə indi qızıl külçələrinin idxalına gömrük rüsumu tətbiq edilməyəcəyini bildirən yeni qərar dərc edəcəyini açıqlayıb. Ağ Ev rəsmisi “Bloomberg”ə göndərdiyi yazılı açıqlamada, administrasiyanın qızıl və digər xüsusi məhsullara tətbiq olunan gömrük rüsumları ilə bağlı yanlış məlumatları dəqiqləşdirmək üçün yaxın vaxtlarda prezident fərmanı yayımlamağı planlaşdırdığını bildirib.

Bu xəbərin ardından “New York Comex”də fyuçers qiymətləri qazancını azaltdı, Londondakı spot qiymətlər üçün qlobal istinad qiyməti isə gerilədi. İlk gömrük rüsumu şokundan sonra 100 dolları aşan iki əsas ticarət mərkəzindəki qiymət fərqi 60 dolların altına düşdü.

Ağ Ev rəsmisinin açıqlamasından sonra qızıl ilə bağlı şirkətlərin səhmləri də sürətlə dəyər itirdi. “Newmont Corp.” və “Agnico Eagle Mines Ltd.” kimi iri qızıl mədənçilik şirkətləri, qızıl lisenziya təminatçısı “Franco-Nevada Corp.” və “VanEck Gold Miners ETF” kimi fondlar əvvəlki qazancını sildi.