Suriya rejimi iki ilə yaxındır davam edən qanlı qətliamlar seriyasından daha birini törədib. Budəfəki qətliam öz amansızlığı ilə fərqlənir. Xəbərlərə görə, Bəşər Əsədin aviasiyası ölkənin Qamma əyalətinin Qalfiyə şəhərində çörək növbəsində dayanmış insanlara bomba zərbələri endirib. Yüzlərlə insanın çörək sexinin qarşısında növbəyə dayandığı bir vaxtda endirilmiş aviazərbələr nəticəsində əksəriyyəti azyaşlı uşaqlar və qadınla olmaqla, 300-ə yaxın adamın öldüyü bildirilir.

Məlumata görə, həmin şəhər bu yaxınlarda müxalifət qüvvələrinin nəzarətinə keçib və Əsəd ordusu şəhəri intensiv şəkildə bombalayır. Bildirilir ki, Qalfiyə şəhərində törədilmiş qətliam Suriyadakı müharibə ərzində ən qanlı qətliamdır. Ölənlərin sayının artacağı təxmin edilir, belə ki, bomba zərbələri nəticəsində bir neçə bina da dağılıb və dağıntılar altında xeyli adam qalıb. İnternetdə Qalfiyə şəhərindəki qırğının dəhşətli videogörüntüləri yayılıb və kadrlarda çoxlu uşaq, qadın cəsədlərinin tanınmaz hala düşdüyü əks olunur. Xəbərlərə görə, Əsəd ordusu Dəməşq ətrafına və digər şəhərlərdə də zərbələr endirib, bu zərbələr nəticəsində yüzdən çox adam həlak olub.
İnsan haqları müdafiəçilərinin məlumatlarına görə Suriyada öldürülənlərin sayı, 60 mini keçir, bəzi məlumatlara görə, 100 minə yaxındır. Beynəlxalq ictimaiyyət isə hələ də Əsəd rejiminin öz xalqına qarşı qətliamlarını dayandırmaq üçün hərəkətə keçmir. Britaniyanın «The Guardian» qəzetinin yazdığına görə, Rusiya Əsəd rejiminin ayaqda qalmasına imkan yaradan əsas mənbədir. Qəzetin yazdığına görə, Rusiya hərbi mütəxəssisləri Suriya Hava Hücumundan Müdafiə qüvvələrini xeyli ölçüdə gücləndirib və əgər Qərb ölkələri Əsəd rejiminin kimyəvi silahlarına qarşı xüsusi əməliyyat keçirməli olsa, onların işi çətinləşəcək. Suriyada hazırda Rusiya Baş Kəşfiyyat İdarəsinin xüsusi təyinatlıları və hava hücumundan müdafiə üzrə təlimatçılar var. «The Guardian» yazır ki, Əsədin HHM sistemini dəf etmək üçün əvvəlcə kəşfiyyat vasitələri tətbiq edilməlidir. Belə vasitələr isə ancaq ABŞ-da var. Söhbət kəşfiyyat peyklərindən və «stels» texnologiyasına əsaslanan pilotsuz təyyarələrdən gedir. «Ona görə də Əsədə qarşı hərbi kampaniyaya Vaşinqton başçılıq etməlidir» deyə qəzet yazır. Bununla belə, bildirilir ki, ABŞ rəhbərliyində Suriyaya müdaxiləyə dair vahid mövqe yoxdur.