Almaniyada pivə istehlakı 2025-ci ildə kəskin şəkildə azalıb. “Oettinger Brauerei” istehsal zavodunu bağlayır, sektor kiçilir və şirkətlər yeni içkilərlə ayaqda qalmağa çalışır.

“Oettinger Brauerei”nin baş icraçı direktoru Ştefan Blasşak (Stefan Blaschak) bildirib ki, sektorda necə deyərlər “torpaq sürüşməsi” yaşanır. Bir çox kiçik müəssisə iflas edir, lakin bu tendensiya iri istehsalçıları da əhatə edir.

Blasşakın “Augsburger Allgemeine” qəzetinə verdiyi məlumata görə, Almaniyada pivə istehlakı son illərdə hər il 2–3% azalırdı. 2025-ci ildə bu göstərici 7–7,5%-ə yüksəldi. Bu, gündə təxminən üç milyon daha az pivə qutusu deməkdir. Xüsusilə “Oettinger”də itkilər böyük oldu; buna görə şirkət gələn il “Braunschweig”dəki istehsal zavodunu bağlayacaq.

“Oettinger Getränke” dörd zavodda təxminən 800 nəfəri işlə təmin edir. Şirkət uzun müddətdir NGG (Nahrung Genuss Gaststätten) sindikatı ilə toplu əmək müqaviləsi üzrə razılıq əldə edə bilmir. Aşağı əmək haqqı təklifləri və bəzi əlavə ödənişlərin ləğvi səbəbindən keçən həftə iki günlük xəbərdarlıq aksiyası keçirildi. Blasşak isə sektorda mövcud çətin vəziyyət nəzərə alınaraq, maaş artımlarının yalnız məhsuldarlığın yüksəlməsi ilə mümkün ola biləcəyini bildirib. Növbəti beş ildə istehsalın 80 milyon hektolitrdən 65 milyona düşəcəyi gözlənilir.

Gənclər alkoqolsuz içkilərə üstünlük verir

Alman Pivə Birliyinin məlumatına görə, istehlak vərdişləri köklü şəkildə dəyişib. Gənclər daha az spirtli içki qəbul edir və sağlam, spirtsiz içkilərə üstünlük verirlər. Yaşlı əhali isə təbii olaraq daha az pivə içir. Artan enerji, xammal və işçi maliyyətləri də mənfəət marjalarını azaldır. Təxminən 1 500 pivə istehsalçısı arasında sərt rəqabət vəziyyəti daha da çətinləşdirir. Birliyin prezidenti Holqer Eyçel bildirib ki, zəif iqtisadi mühit qastronomiya sektoruna da mənfi təsir edir və bu, birbaşa pivə satışlarına əks olunur. ABŞ-la ticarətdə gömrük razılaşmaları da ixracı məhdudlaşdırır.

2025-ci ilin ilk yarısında pivə satışı 1993-cü ildən bəri ilk dəfə 4 milyard litr həddinin altına düşüb. Lakin pivə qarışığı içkilərində 8%-lik artım qeydə alınıb. Hələlik bazarın 5,6%-ni təşkil edən bu seqmentin gələcəkdə böyümə potensialı olduğu bildirilib. “Oettinger” də strategiyasını dəyişir: şirkət yalnız pivə istehsalçısı olmaqdan çıxaraq funksional içkilər və proteinlə, liflə zəngin spirtsiz məhsullar hazırlamağa fokuslanır.