«Uşaqlar yemək zamanı yalnız su və ya süd içə bilərlər. Şirin meyvə şirələri və ya qazlı sular uşaqlardan mümkün qədər uzaq tutulmalıdır. İmkan varsa, uşaqların şirin qazlı sular içmələrini ümumiyyətlə yasaqlayın. Övladlarınızın xəstə, ən qorxulu mərəzlərə düçar adama çevrilməsini istəmirsinizsə, onun qidalanmasına, nə yeyib-içdiyinə ciddi fikir verin».

Britaniyanın Səhiyyə Nazirliyinin bu gün yaydığı «Valideynlərə müraciət»ində belə deyilir.

Meyvə şirələrinin uşaqların orqanizmi üçün xeyirli olduğunu düşünən, bu şirələri vitamin və mikroelementlər mənbəyi sayan şəxslər yanılırlar.

Meyvə şirələrinə aludə olan uşaqların orqanizmlərində şəkər miqdarı da normadan minimum 40 faiz artıqdır.

Bundan başqa, yemək zamanı meyvə şirələri və ya qazlı sular içən uşaqlarda sürətlə kökəlmə, piylənmə, izafi çəki artımı, 2-ci tip şəkərli diabet, ürək-damar sistemində fəsadlar və ağır ürək çatışmazlıqları yaranır.

Britaniya Səhiyyə Nazirliyinin ekspertlərinin qəti fikrincə, uşaqların masasında qidalanma zamanı meyvə şirələri və qazlı sular olmamalıdır.

London Kral Kollecinin professoru, məşhur dietoloq Tom Sandersin dediyinə görə, şirin sular içmək insan orqanizmi üçün təhlükəlidir.

«Uşaqlar yemək yeyəndə belə zəhərlərdən, «təbii meyvə şirəsi» adı ilə satışa çıxarılan məhsullardan uzaq olmalıdırlar. Birdəfəlik anlamaq gərəkdir ki, marketlərdə heç bir halda saxlama müddəti 1 həftədən çox olan təbii meyvə şirəsi satıla bilməz. Reklamlara aldanaraq, tamaha əsir düşərək uşaqlarımızı xəstə, şikəst etməyək. Uşaq yemək yeyəndə masanın üstündə sadəcə adi su və ya süd olmalıdır», - Tom Sanders söyləyib. Onun sözlərinə görə, 250 millilitr portağal şirəsində 115 kalori və ya 7 çay qaşığı şəkər, 1 banka Coca-Colada isə 139 kalori var.

Oksford Universitetinin professoru Syuzan Cebb də hesab edir ki, uşaqlara heç bir halda, ümumiyyətlə şirinləşdirilmiş və ya qazlı içkilər, «təbii» meyvə şirələri vermək olmaz.

Britaniya Səhiyyə Nazirliyi hökumətə və parlamentə müraciət edərək meyvə şirələri kimi satılan içkilər, habelə sərinləşdirici və qazlı içkilərin qiymətlərinin bahalaşdırılmasını təklif edəcək.

«Şəkər vergisi» adlanan bu təklifə görə, Britaniyada 1 banka Coca-Colanın qiyməti 0,48 funt-sterlinqə çatdırılmalıdır.

Bundan başqa, ibtidai və orta məktəblər, habelə liseylərdən ən azı 300 metrlik məsafədə qazlı və sərinləşdirici içkilərin satışının yasaqlanması təklif olunub. (milli.az)