Şəhərin yeni planlarına əsasən, 2028-ci ildən etibarən 10 mindən çox mənzil sahibinin turistlərə ev kirayə verməsi qadağan ediləcək. Şəhər rəsmiləri artan mənzil xərclərini azaltmaq üçün bu mübahisəli qərarı veriblər.

Şəhər meri Jaume Kolboni (Jaume Collboni) bildirib ki, Eyrbienbi (Airbnb) və Homavey (Homeaway) kimi platformalarda 10 mindən çox ev 2028-ci ildən şəhər sakinlərinin istifadəsinə veriləcək.

Mer, məşhur tətil şəhərində ev kirayələri qiymətlərinin son 10 ildə 68 faiz, ev sahib olma xərclərinin isə 38 faiz artdığını iddia edib.

“Biz Barselonanın ən böyük problemi olduğuna inandığımız şeylə üzləşirik. Daha çox mənzil təchizatına ehtiyac var və bu gün təqdim etdiyimiz tədbirlər daha çox təchizatı təmin etməkdir”, – dedi.

Kolboninin əleyhdarları onu mülkiyyət hüquqlarını pozmaqda günahlandırdılar və bu addımın Venesueladakı radikal sol rejimin etdiklərinə bənzədiyini iddia etdilər.

Barselona Turist Mənzilləri Assosiasiyası dəyişikliyin mənzillərin qeyri-qanuni olaraq turistlərə kirayə verilməsinə səbəb olacağını bildirib və qanunun bələdiyyə sədrinin mənzil siyasətindəki uğursuzluğunu “maska ​​etdiyini” iddia edib.

Kolboninin açıqlamasına reaksiya verən bəzi solçu şura üzvləri 2028-ci ilin artıq şəhəri tərk etmək məcburiyyətində qalan insanlar üçün çox uzaq bir gələcək olduğunu bildiriblər. Cenet Sanz, “2028-ci ilə qədər gözləyə bilərikmi?”, – soruşub.

Barselona hökuməti qadağa qüvvəyə mindikdən sonra mümkün qeyri-qanuni turist mənzillərini aşkar etmək üçün “möhkəm” yoxlama rejimini davam etdirəcəyini bildirib.

Hökumət 2016-cı ildən bəri 9700 qeyri-qanuni turist mənzilinin bağlanması barədə göstəriş verib və təxminən 3500 mənzil şəhər sakinləri üçün əsas yaşayış yerlərinə çevrilib.

Son rəqəmlərə görə, Barselonadakı turistik yerlər və otellər 2022-ci ildə 9,7 milyon turisti qəbul edib və ümumilikdə 29,8 milyon gecələmə qeydə alınıb.

Son aylar İspaniyanın bəzi bölgələrində, o cümlədən Kanar adalarında minlərlə insan ətraf mühitə zərər verdiyini və yerli insanları köçürdüyünə görə kütləvi turizmin təsirlərinə etiraz edir.

İyun ayında minlərlə insan Balear adalarında “kütləviləşmə” adlandırılan kütləvi turizmə və insanların sıxlığına etiraz etmək üçün küçələrə çıxıb.

Palma de Mallorkada etiraz aksiyasını təşkil edən kollektivdən Karme Reynes, “İstəyirik ki, hakimiyyət orqanları 5 ildən artıqdır ki, burada yaşamayan insanların əmlak almasına mane olsunlar və tətil üçün yerləşdirməyə daha ciddi nəzarət etsinlər”, – deyib.

Mayorkadakı daşınmaz əmlak agenti Xaviyer Karbonell “Biz daha az kütləvi turizm və daha davamlı turizm istəyirik”, – deyib.

İspaniya polisinin sözçüsü bildirib ki, Mayorkada keçirilən etiraz aksiyasında təxminən 10 min, Minorkada isə bir neçə yüz adam iştirak edib.