Bazar iştirakçılarının FED-in dekabr ayında keçirilməsi planlaşdırılan toplantısında uçot dərəcələrini dörddə üç faiz ehtimalla 0.50 faiz, dörddə bir faiz ehtimalla isə 0.75 faiz artıracağı proqnozlarını qiymətləndirməsi dollar indeksinin 105 bənd hədlərinə qədər geriləməsinə səbəb oldu. Təhlillərə əsasən dollar indeksindəki geriləmə davam edərsə, avro və funt-sterlinq müvafiq olaraq 1.05 dollar və 1.22-ə kimi bahalaşa bilər.

Bu gün Almaniyanın iqtisadi inkişaf səviyyəsinə dair açıqlanacaq statistik göstəricilər investorların diqqət mərkəzində olacaq.

Cümə axşamı keçirilən toplantısı zamanı Türkiyə Cümhuriyyəti Mərkəzi Bankı uçot dərəcələrini 10.50 faizdən-dən 9-a endirsə də, valyuta bazarlarında dolların təklifinin çoxluğu səbəbilə lirədə kəskin ucuzlaşma müşahidə olunmadı. Türk lirəsi son 2 aydır müşahidə olunan üfüqi tendensiyasını davam etdirir.

Dollar indeksindəki geriləmə fonunda qızıla tələb artır. Hazırda dünya birjalarında 1759 dollardan təklif olunan qiymətli metalın bir unsiya üzrə dəyəri 1761 həddinin üzərinə yüksəlsə, 1780 dollara kimi bahalaşa bilər.