Neft qiymətləri dünənki artımlarından sonra Asiya sessiyasında geriləyib. Tacirlər Rusiyaya qarşı əlavə ABŞ sanksiyaları ehtimalını və Ukraynadakı müharibənin bitməsi üçün aparılan sülh danışıqlarında irəliləyiş siqnallarını dəyərləndirirlər.

Vaxt.az xəbər verir ki, Bakı vaxtı ilə saat 08:00-ə olan məlumata görə, oktyabr fyuçersləri üzrə “Brent” markalı neftin qiyməti 0,49% azalaraq bir barel üçün 68,46 dollara “WTI” markalı xam neftin qiyməti isə 0,44% ucuzlaşaraq 64,44 dollara enib.

Hər iki kontrakt bir gün əvvəl Ukraynanın Rusiyanın neft və qaz infrastrukturuna “drone” hücumlarından sonra təchizat risklərinin güclənməsi fonunda təxminən 2% artım nümayiş etdirmişdi.

Azərbaycan brendi “Azeri Light” nefti 0,16 dollar və ya 0.21% bahalaşaraq, 74,92 dollara ticarət olunur.

Geosiyasi gərginliklər fonunda təchizat riski

Ukraynadakı müharibə hələ də bazar əhvalının əsas təkanverici faktoru olaraq qalır. ABŞ Prezidenti Donald Tramp vasitəçi rolunu üzərinə götürməyə çalışsa da, ötən həftə əgər iki həftə ərzində barışıq istiqamətində real irəliləyiş olmasa, Moskvaya qarşı yeni sanksiyalar tətbiq edəcəyini bəyan edib.

ABŞ-ın vitse-prezidenti Ceyms Vens isə Rusiyanın “əhəmiyyətli güzəştlərə” getdiyini iddia edib. Lakin Qərb diplomatları Moskvanın bağlayıcı mexanizmlərə hələ razılıq vermədiyini bildirirlər.

Tramp, Ukrayna Prezidenti Vladimir Zelenski və Rusiya Prezidenti Vladimir Putinlə üçtərəfli görüş keçirilməsi təklifini gündəmə gətirib, lakin tarix hələlik müəyyən edilməyib.

Mümkün sülh sazişi bazarlarda ikili təsir yaradır: əgər razılaşmadan sonra ABŞ Rusiyaya tətbiq etdiyi neft sanksiyalarını yumşaldarsa, bu, qlobal təklifin artmasına və qiymətlərin aşağı düşməsinə səbəb ola bilər. Lakin barışıq barədə ilkin optimizmin zəifləməsi və əksinə, yeni sanksiya ehtimalları qiymətləri dəstəkləməkdə davam edir.

ABŞ-Hindistan ticarət gərginliyi

Digər tərəfdən, ABŞ-ın 27 avqustdan etibarən Hindistandan idxal olunan mallara əlavə 25% gömrük tarifi tətbiq edəcəyi açıqlanıb. Bununla ümumi tarif dərəcəsi 50%-ə yüksələcək.

Vaşinqtonun bu addımı Hindistanın Rusiya neftinin idxalını artırmasına cavab kimi qiymətləndirilir. Yeni Dehlinin rəsmiləri qərardan narazılıq ifadə edərək ölkənin “əsas maraqlarını müdafiə edəcəyini” bildiriblər.

Bəzi Hindistan emalçıları isə əlavə tariflərə baxmayaraq Rusiya nefti idxalını davam etdirməyə hazır olduqlarını açıqlayıblar. Bu isə qlobal bazarda dayanıqlı tələbin qalacağına işarə edir.