Kripto valyuta bazarlarında yay aylarının son günlərində volatillik daha sabit qiymət hərəkətinə yerini verərkən, sərmayəçilərin diqqəti ilin son rübünə yönəlmişdir. BTC başda olmaqla böyük həcmli kripto aktivlər yön axtarışını davam etdirərkən, Ethereum (ETH) və Solana (SOL) kimi önəmli altcoinlər əməliyyat həcmi və institusional maraqdakı artım ilə diqqət çəkir. Zəncir üstü (on-chain) məlumatlar göstərir ki, xüsusilə son günlər BTC-də alım gücü zəifləyib və bazar yeni bir konsolidasiya mərhələsinə daxil olub.

BTC bu gün də düşüş meylli hərəkətini davam etdirərək 109.400 dollara qədər enib. Lakin ABŞ-da PCE göstəricilərinin açıqlanmasından sonra sürətli alışlarla 111.000 dollar səviyyəsinə qalxdı. Kripto valyuta son saatlar ərzində 111.000 dolların bir qədər altında qalır.

“CryptoQuant” tərəfindən yayımlanan məlumatlara görə, BTC təklifinin 90% hissəsi hələ də mənfəətdədir. Bu göstərici, keçmiş bazar dövrlərində düzəliş hərəkətlərindən əvvəlki kritik səviyyəyə işarə edir. Həmin analizdə “Binance” birjasındakı orta BTC girişlərinin 2024-cü ilin əvvəlində 0,8 BTC olduğu, bu gün isə 13,5 BTC-yə yüksəldiyi qeyd edilir. Bu artım fərdi sərmayəçilərdən institusional sərmayəçilərə doğru aydın bir kapital keçidini göstərir. “CryptoQuant” analitiki “Crypto Dan” spot ETF-lərin və institusional-birja təsirinin bu inkişafda əsas rol oynadığını bildirir.

“Glassnode”un yayımladığı məlumatlara görə isə spot bazardakı yön təyin edən təzyiq azalmış vəziyyətdədir. “Cumulative Volume Delta (CVD)” göstəriciləri alıcı təzyiqinin zəiflədiyini və alış-satış balansının neytral səviyyəyə döndüyünü göstərir. Bu vəziyyət, keçmişdə 111.000 dollara yaxınlaşan rallilərdə müşahidə olunan güclü alım momentumunu nəzərə alaraq, bazarda alım yönlü iştahın əhəmiyyətli dərəcədə azaldığını göstərir. Lakin bəzi mütəxəssislərə görə makroiqtisadi inkişaflar – məsələn, sentyabr ayında gözlənilən potensial ABŞ faiz endirimi – bu durğunluğu tərsə çevirə bilər.

ETH cəbhəsində 2021 tərzi hərəkətlilik

BTC-nin yönsüz hərəkət etdiyi bu dövrdə, ETH güclü zəncir üstü göstəricilərlə pozitiv ayrılır. 2025-ci ilin avqust ayında ETH şəbəkəsindəki ümumi transfer sayı 46,9 milyonu aşaraq May 2021-dəki 45,06 milyonluq rekordu geridə qoyub. Həmin dövrdə şəbəkənin daşıdığı həftəlik likvidlik 14 milyard dolları keçib. ETH bu performansla həm “on-chain”, həm də qiymət baxımından son üç ilin ən parlaq aylarından birini keçirib.

ETH son günlər 4.300 dollar üzərində qalmağa müvəffəq olub və zəncir üstü aktivliyə olan maraq yenidən sürət qazanıb. “The Block Data”ya görə, şəbəkədəki aylıq aktiv istifadəçi sayı 9,7 milyona çatıb. DeFi protokolları və sabit kripto əməliyyatları ETH şəbəkəsindəki məlumat sıxlığının böyük hissəsini təşkil edir, NFT və oyun yönümlü tətbiqlərdən çox maliyyə tətbiqlərinə yenidən yönəlmə diqqət çəkir. Böyük cüzdan sahiblərinin satışlarına baxmayaraq, birjalara daxil olan kapitalın əhəmiyyətli hissəsinin ETH alışına yönəlməsi, qısa müddətli düzəlişlərə baxmayaraq ETH-dəki güclənmə meylini dəstəkləyir.

SOL-a institusional maraq: 300 dollar hədəfi gündəmdə

SOL həm institusional maraqdakı artım, həm də texniki qrafikdəki qırılmalarla bu həftə diqqət çəkən başqa bir aktiv olub. Xüsusilə opsion analisti Ceyk Ostrovskis (Jake Ostrovskis)-ə görə SOL, ETF təsdiqi gözləntiləri və institusional trezorların alışları ilə ilin sonunda ciddi bir ralli potensialı daşıyır. Artıq SOL üçün ETF-lər və stake əsaslı məhsullar üzrə müraciətlərin izləndiyi, “VanEck” kimi böyük aktiv idarəçilərinin bu sahədə aktiv olduğu məlumdur.

Son olaraq “DeFi Development Corporation”, 77 milyon dollarlıq əlavə alış edərək SOL aktivlərini 1,83 milyon ədədə çıxarıb. Eyni şəkildə “Sharps Technology” 400 milyon dollarlıq bir fon yaradıb və bunu 1 milyard dollara qədər artırmağı planlaşdırdığını açıqlayıb.

Beləliklə, açıq şirkətlərin əlindəki ümumi SOL miqdarı 8,69 milyon ədədə, yəni təxminən 1,87 milyard dollar həcmindədir.

Kripto bazarında ümumi görünüş qısa müddətdə dalğalanma ilə davam etsə də, orta və uzun müddətdə institusional tələb, ETF inkişafları və zəncir üstü siqnallar sayəsində yeni bir yüksəliş dövrünün əsasları qoyula bilər. BTC konsolidasiya etdiyi bu dövrdə, ETH və SOL kimi layihələr tempi ələ alır, gələcək həftələrdə açıqlanacaq makroiqtisadi göstəricilər və ETF qərarları bazarın yönünü müəyyən edəcək.