Ötən həftə kripto varlıq investisiya məhsullarından ümumilikdə 352 milyon ABŞ dolları həcmində çıxış baş verib. ABŞ-da zəif açıqlanan məşğulluq göstəriciləri və sentyabrda faiz endirimi gözləntilərinin artmasına baxmayaraq, investor iştahı məhdud qalıb. Həftəlik əməliyyat həcmi əvvəlki həftə ilə müqayisədə 27% azalıb. Bu gedişat, risk alma istəklərinin zəiflədiyini göstərsə də, ilin əvvəlindən bəri qeydə alınan 35,2 milyard dollarlıq xalis giriş ümumi investor inamının hələ də qorunduğunu ortaya qoyur.

Qeyd olunan illik giriş ötən ilin 48,5 milyard dollarlıq ümumi göstəricisinə nisbətdə illikləşdirildikdə təqribən 4,2% daha yüksək performans göstərir. Bu da qısamüddətli dalğalanmalara rəğmən uzunmüddətli marağın davam etdiyini göstərən mühüm bir məlumatdır.

Regional fərqlər

Regional göstəricilərə baxıldıqda, investor davranışlarında kəskin fərqlər müşahidə olunub. ABŞ mənşəli kripto varlıq fondlarından ümumilikdə 440 milyon dollar çıxış qeydə alınıb. Bu rəqəm həftəlik çıxışların əsas hissəsini təşkil edərək ümumi mənzərəni mənfi istiqamətdə dərinləşdirib.

Buna qarşılıq Almaniyada 85,1 milyon dollar, Honkonqda isə 8,1 milyon dollarlıq giriş qeydə alınıb. Bu da bəzi ölkələrdə investorların hələ də kriptovalyutalara müsbət yanaşdığını göstərir.

“Bitcoin”ə güclü maraq davam edir

Ümumi çıxışlara baxmayaraq, “Bitcoin” fondlarına maraq azalmayıb. Ötən həftə “Bitcoin” investisiya məhsullarına 524 milyon dollar həcmində xalis giriş baş verib. Bu isə, investorların bazardakı zəifliyə baxmayaraq “Bitcoin”i təhlükəsiz liman kimi gördüklərini təsdiqləyir.

“Bitcoin”ə artan maraq onun lider mövqeyini qoruduğunu və makroiqtisadi qeyri-müəyyənlik dövrlərində üstünlük verilən aktiv olaraq qalmasını göstərir.

“Ethereum”da rekord həftəlik çıxış

“Ethereum” həftəlik əsas çıxışın qeydə alındığı kripto aktiv olub. Ötən həftə “Ethereum” fondlarından 912,4 milyon dollar həcmində çıxış baş verib. Çıxışlar bütün ticarət günləri boyunca davam edib və müxtəlif emitentlərdən gəlib. Bu isə investorların qısamüddətli riskləri qiymətləndirməsi ilə izah olunur.

Bununla belə, ilin əvvəlindən bu yana “Ethereum”a ümumilikdə 11,2 milyard dollar həcmində giriş qeydə alınıb. Bu fakt uzunmüddətli investor marağının hələ də güclü qaldığını göstərir.

“Solana” və “XRP” müntəzəm giriş cəlb edir

Digər tərəfdən “Solana” və “XRP” kimi alternativ kriptovalyutalar investor marağını sabit şəkildə cəlb etməyə davam edir. “Solana” ardıcıl 21-ci həftə də giriş qeydə alaraq mühüm uğura imza atıb. İlin əvvəlindən bu yana “Solana” fondlarına 1,256 milyard dollar həcmində giriş olub.

“XRP” də oxşar güclü performans göstərir. İlin əvvəlindən bəri “XRP” investisiyalarının ümumi həcmi 1,412 milyard dollara çatıb. Bu göstəricilər hər iki kripto aktivin davamlı artım trayektoriyasında olduğunu ortaya qoyur.