Avqustun ilk yarısında 124.447 dollarla tarixi zirvəyə çatan “Bitcoin” (BTC), sonrakı mərhələdə mənfəət satışları və mövqelərdə tarazlığın pozulması fonunda təxminən 12% dəyər itirib. ABŞ Federal Ehtiyat Sistemi (FED) rəhbəri Cerom Pauellin “Jackson Hall” çıxışında nisbətən yumşaq siqnallar verməsi sentyabrda faiz endirimi ehtimalını artırsa da, bazar bu gözləntini artıq böyük ölçüdə qiymətə daxil edib. Bu səbəbdən, qısamüddətli yüksəlişlər satış fürsətinə çevrilib və kriptovalyuta eniş tendensiyasını qoruyub.

Bazar gündəmində əsas diqqət FED-in pul siyasətinə yönəlib. Pauell faiz endiriminə işarə etsə də, ABŞ prezidenti Donald Tramp ilə FED arasındakı gərginlik risk iştahasını aşağı salır. Trampın sürətli faiz endirimi üçün FED-ə təzyiq göstərməsi, rəhbərlikdə üstünlük qazanmağa çalışması və qurumun müstəqilliyinin sual altına düşməsi, uzunmüddətli perspektivdə ABŞ iqtisadiyyatına zərər vura biləcəyi narahatlığını artırır. Hərçənd Trampın addımları günün sonunda bazarın gözləntisi olan faiz endiriminə yönəlsə də, hazırkı mənzərə riskli aktivlərdə satış basqısı yaradır. Bunun fonunda qızıla tələbat artıb – avqust boyunca 4% bahalaşan metal “təhlükəsiz liman” statusunu gücləndirib. Eyni dövrdə “Bitcoin”in 5% ucuzlaşması isə investor inamının hələ də kövrək olduğunu göstərir.

İnstitusional investorların marağı ümumilikdə güclü qalır. “Bitcoin” ETF-lərində alım yönümlü əməliyyatların üstünlüyü bazarda inamın tam itirilmədiyini göstərir. Lakin qısamüddətli kapital axınlarında “Ethereum” (ETH) və “Solana” (SOL) ön plana çıxıb. Son 5 gündə ETH ETF-lərinə 1,83 milyard dollar giriş olduğu halda, BTC ETF-ləri yalnız 171 milyon dollar cəlb edə bilib. Bu da “Bitcoin” üçün alternativ təzyiq faktoru olaraq qalır.

Zəncirüstü göstəricilər hazırda təklifin təxminən 90%-nin hələ də mənfəətdə olduğunu göstərir. Bu səviyyə kritikdir, çünki tarixi təhlillərə əsasən, mənfəətli təklifin 90%-in altına düşməsi adətən korreksiya mərhələlərinin başlanmasına işarə edir. Əksinə, bu həddin üzərində qalmaq qiymətin yenidən zirvəyə yönəlməsi baxımından həyati əhəmiyyət daşıyır.

Opsion bazarı isə 116.000 dolları “maksimum ağrı” nöqtəsi kimi göstərir. Bu da qiymətin mühüm dəstək səviyyələrində qorunması halında yuxarı yönlü reaksiya ehtimalını artırır.

Texniki baxımdan “Bitcoin” bu həftə gündəlik qrafikdə daha da kəskinləşən enən kanalın aşağı həddinə yaxınlaşaraq 109.700 dollar dəstəyini sınaqdan keçirir. Bu səviyyənin altında 106.000 dollar dayanır ki, həm əsas dəstək, həm də həftəlik qrafikdə uzunmüddətli yüksəliş kanalının alt sərhədi ilə üst-üstə düşür.

Tarixi hərəkətlər göstərir ki, bu kanal hüdudu üç dəfə test olunub və hər dəfə güclü yüksəlişlər izlənib. Pozitiv ssenaridə, qiymətin 106.000 dollaradək geri çəkilməsi və burada güclü alıcı dəstəyi tapması qısamüddətli olaraq 115.000 dollar (düşən kanalın üst xətti), ardınca isə 125.000 dollar ətrafına doğru yüksəlişi təmin edə bilər. Daha geniş perspektivdə isə həftəlik kanalın yenidən aktivləşməsi “Bitcoin” üçün 150.000 dollar hədəfinə doğru yeni trendin başlanğıcına zəmin yarada bilər.

Mənfi ssenaridə isə 106.000–102.000 dollar aralığı diqqətlə izlənəcək. Bu zolağın həftəlik bağlanışla qırılması daha genişmiqyaslı korreksiyanı gündəmə gətirə bilər. Bu halda “Bitcoin” üçün 93.000–95.000 dollar dəstəyi, hətta orta müddətdə 70.000 dollar zonası müzakirəyə çıxarıla bilər.

“Bitcoin”in qısamüddətli görünüşü hazırda kövrək qalır. Makro cəbhədə FED-in faiz addımları və Tramp–FED gərginliyi bazar üçün əsas həlledici faktor olaraq qalır. Bununla yanaşı, zəncirüstü göstəricilər və institusional maraq qiymətin struktur dəstəklər tapmasını təmin edir. Bu mənzərədə, mövcud enişlər potensial alım fürsəti kimi qiymətləndirilə bilər. Xüsusilə 106.000 dollar civarı kritik hədd olaraq qalır. Buradan gələcək güclü alımlar ilin son rübündə yeni bir yüksəliş dövrünü başlada bilər.

Xüsusi qeyd: Bu məqalə yalnız məlumat xarakteri daşıyır. Heç bir halda hər hansı aktivin alınmasına təşviq etmir və investisiya üçün çağırış, təklif, məsləhət və ya tövsiyə təşkil etmir. Kriptovalyutalar yüksək risk daşıyır və hər bir qərar, eləcə də onunla bağlı məsuliyyət yalnız investorun üzərinə düşür.