Braziliya, Beynəlxalq Enerji Agentliyinə (İEA) tamhüquqlu üzv olmaq üçün rəsmi müraciət göndərib.

İEA-nın açıqlamasına görə, Braziliya uzun illərdir qurumla mövcud sıx tərəfdaşlığa və mürəkkəb qlobal enerji mühitində agentliyin üzv ölkələrə verdiyi güclü dəstəyə əsaslanaraq tam üzvlük üçün addım atıb.

Braziliyanın xarici işlər naziri Mauro Vieyra və mədən-enerji naziri Aleksandre Silveyranın məktubu Parisdəki İEA qərargahında ölkənin səfiri Sarquis J.B. Sarquis tərəfindən İEA-nın icraçı direktoru Fatih Birola təqdim olunub. Məktubda Braziliyanın quruma üzvlük prosesini başlatmaq istəyi rəsmi şəkildə çatdırılıb.

Nazirlər müraciətlərində Braziliyanın İEA ilə tərəfdaşlığa verdiyi dəyəri vurğulayaraq qeyd ediblər: “Bu əməkdaşlıq illər ərzində Braziliyanın enerji siyasətlərinin inkişafına mühüm töhfə verib. Enerji sahəsində qarşıdakı çağırışları və İEA-nın üzv ölkələrə təqdim etdiyi strateji dəstəyi nəzərə alaraq, hökumətimizin İEA-ya tam üzv kimi qoşulmaq prosedurunu başlatmaq istədiyini məmnuniyyətlə bildiririk”.

Fatih Birol isə Braziliyadan gələn rəsmi müraciəti böyük məmnuniyyətlə qarşıladığını bildirərək, “Bu hadisə enerji sahəsində illərdir dərinləşən əməkdaşlıq üzərində qurulan, beynəlxalq idarəçilik baxımından mühüm bir addımdır. Braziliya bu gün qlobal enerji sisteminin əsas dayaqlarından biridir və qarşıdakı illərdə onun əhəmiyyəti daha da artacaq. Braziliya və üzv ölkələrimizlə növbəti addımları müzakirə etməyi səbirsizliklə gözləyirik”, – deyib.