Trampın Cənubi Qafqazla bağlı planı varmı? Məşhur cizgi filminin qəhrəmanı demişkən “Planınız varmı, mister Fiks?!”

ABŞ-ın yeni administrasiyası hələ ki, bu məsələ ilə bağlı susur. Ukrayna və Qəzza problemi indi Tramp üçün əsas prioritet olsa da Cənubi Qafqazın gözardı ediləcəyi gözlənilmir.

Uzun illər ABŞ-ın bölgədə geosiyasi maraqları Rusiya ilə balans siyasəti üzərində qurulmuşdu.

Lakin son 5 ildə bu vəziyyət kəskin dəyişib.

Azərbaycanın ərazi bütövlüyünü bərpa etməsi Cənubi Qafqazda yeni vəziyyət yaradıb. Logistika marşrutlarının diversifikasıyası bu baxımdan mühüm məsələyə çevrilib.

ABŞ Cənubi Qafqazda Çinlə üz-üzə gələcək.

Çünki Çinin sürətlə MDB məkanında daxil olması və logistika arteriyaları üzərində nəzarət cəhdi Tramp administrasiyanın diqqətindən qaça bilməz.

Tramp üçün Çini cilovlamaq, Avropa bazarlarını amerikan mallarının ixracı üçün problemsiz məkana çevirmək əsas prioritetdir.

Tramp üçün Moskva ilə sövdələşmədə əsas indikatorlarından biri budur.

Putin və Tramp yeni geosiyasi cəbhənin konturlarını cızarkən Çin və İran stol üzərində qoyulacaq əsas fiqurlar olacaq.

Burada həmçinin Avropa Birliyinin enerji təhlükəsizliyi ilə bağlı tələbləri öz sözünü deyəcək.

Bu baxımdan Trampın Cənubi Qafqazla -Azərbaycan, Gürcüstan və Ermənistanla bağlı siyasətinin bu məqamlar üzərində köklənəcəyi istisna edilmir.